Mizoram chhunga inkulh tum Assam Police-te dan rih an ni

Assam Police-te chuan nimin khan Hailakandi SP hoin Vairengte tui lâkna, Vairengte aṭanga km. 4 vela hlá Aitlang hnâr lamah inkulh an tuma hriat a ni a, Mizoram police-te leh Vairengte mite'n an lo dang. He thu ziah lai thleng hian Assam police-te hi an la kîr lo a, buaina chhuak a awm lo.

Vairengte aṭanga Vanglaini thu dawn danin, nimin chhun khan Assam police-te chuan Aitlang ram an pan a, chu chu an hriat veleh Vairengte SDO (Civil) Issac C Lalrempuia leh SDPO Ramtharnghaka hoin IR police-te'n Aitlang ram an pan ve nghal a ni. Vairengte khawtlang hruaitute leh ṭhalaite pawh a ṭul anga hma la turin Aitlang ramah an kal ve a ni.

Assam police-te chu an ṭhahnem hle a, puan-in, bungbél leh rálthuam chi hrang hrang nen an thawk chhuak a; mahse, inkulh an tumna hmun thlen hmain lo dan an ni. He thu ziah lai thleng hian dan an la ni a, buaina erawh a chhuak lo thung. A hmuna awmte hnen aṭanga thudawn danin, buaina erawh chhuak thut thei a ni.

Assam police-te hian chaw ei khama haw leh nghal mai tur angin an insawi a, mahse, an bungraw kente avangin haw leh nghal mai an tum a rinawm loh niin Vanglaini chuan thu a dawng.

June 27, 2021 tlai pawh khan Hailakandi DSP hoin Assam police leh forester bakah, civil mi eng emaw zat chu Aitlang hnár lama an kal a, an ram chinah Mizote'n huan an nei niin an sawi a ni.

Assam mite an kal tih hriat a nih veleh Vairengte ṭhalai mi pakua chuan Aitlang ram an pan ve nghal a, Assam mite chu an rawn kal chhan an zawt a ni. Hailakandi DSP chuan, an ram mi leh sate aṭanga complaint an dawn angin, an ram chinah Mizote'n huan/lo/ram an siam nia an sawi chu an enfiah thu a sawi.

Inbiakna an neih hnuah Assam mite chu an khaw lamah an lêt leh nghal a, Vairengte ṭhalaite pawh tlai dar 5:30 velah an ṭin a, buaina a chhuak lo a ni.