Covid-19 do dan ngaihtuah turin Chief Minister-in joint meeting a ko

Central YMA bultuma June 24, 2021-a Mizoram Kohhran Hruaitu Committee (MKHC), poli­tical party leh tlawmngai pawlte thurel bawhzuiin chief minister Zoramthanga chuan July 1, 2021-ah joint meeting a ko.

Chief Minister hian June 28, Thawhṭanni khan meeting kohna tichhuakin, "Central YMA huaihawta ni 24.6.2021-a all political party, NGO leh MKHC joint meeting resolution bawhzuina atan meeting koh a ni," a ti a; political party president-te tel ngei se a duh thu a tarlang.

Joint meeting-ah hian political party, tlawmngai pawl leh MKHC hruaitute bakah, minister leh sorkar official ṭhenkhatte tel tura tih an ni a; Chief Secretary-in Covid-19 dona atana hmalakna hrang hrangte a tarlang ang. Páwl leh political party-te chu an aiawh pahnih ṭheuh tír tura tih an ni.

Tarlan tawh angin, CYMA bultuma MKHC, political party leh NGO hruaitute ṭhukhawm chuan resolution pasarih an siam a; chung zingah chuan 'Hripui dona kawngah pheikhai rual zawka ṭan lâk a nih theih nan sorkarin all party meeting ko se,' tih a tel.

CYMA hruaitute chuan June 27 khan Chief Minister hmuin, an thurelte chu tihlawhtling turin an ngen a, tihlawhtling ngei tura an ngen nasat zual chu all party meeting koh a ni.

Joint meeting-a tel tura beiseite chu - Assembly Speaker, Health Minister, Home Minister, Supply Minister, IPR Minister, Covid-19 Medical Operational Team Chair­man, political party aiawh, tlawmngai pawl aiawh, Aizawl Mayor leh AMC councillor pahnih, Indian Medical Association, Non Govt. Hospital Association, Aizawl City Local Council Association, All Mizoram Village Council Association leh MKHC aiawhte a ni.

Sorkar official aṭangin Chief Secretary, Finance Commissioner, Home Secretary, Health Secretary, Aizawl DC leh IPR Director-te tel tura tih an ni bawk.