Hripui vei nau pâi mi pali an thi tawh Nunna chhan a pawimawh ber - Health Minister

Nimin khan Health minister Dr R Lalthang­liana hoin Covid-19 veite enkawl dan sawiho a ni a, hripui vei nau pai mek zinga mi pali an thi tawh tih tarlan a ni. Health Minister chuan, ngaih pawimawh ber tur pakhat chu hripui veite nunna chhanhim a nih thu a sawi.

Dr R Lalthangliana chuan, doctor leh health­care worker-te'n theih­tawp an chhuah tih sawiin, "Thâ leh zung tak meuh sénga an thawh avangin Pathianin an thawh rimna mal a sawm a, state dangte nen khaikhin chuan kan dinhmun a la ziaawm hle. Nunna chhan tura an thawhna a lawmawm. Mizoram mipuiin an chungah rinna an nghat a ni," a ti a, healthcare frontline worker-te chu tha thlah loa theihtawp chhuah zel turin a chah.

SRH-ZMC doctor-te sawi danin, SRH-ah Covid-19 vei nau pâi mi 30 enkawl an ni tawh a, chu'ng zinga 80% chu kum 20-34 inkar niin, a tam ber chu nau thla 8-9 inkar pai an ni.

Nau pai zinga a tam ber chu ICU-ah enkawl nghal an ni a, hripui vei nau chunga thi mi pali an awm tawh. Nau pai enkawl zinga thi zat hi 6.7% a ni a; chutih laiin, nau pâi ni lo zingah chuan Covid-19 vanga thi zat chu 2.2% a ni thung.

Nau pâite himna ngaih pawimawh a nih vangin district hospital zawng zawngah Covid-19 vei nau paite'n nau an hrinna tur a bika siam make-shift labour room siam a ni tawh a, Aizawlah nau pai hripui veite enkawlna tur bik ruahman mek a ni bawk.

ZMC-a doctor-te chuan Covid-19 veite an enkawl dan leh an buaipui dante an sawifiah a, "Damdawi chan har leh man to tak takte sorkarin a chah thleng hi a lawmawm. Tunah chuan a hma aiin damlo na zual enkawl ngai an tlem tawh. Damlote enkawlna tur bungrua leh hmanraw chi hrang hrangah thlaphânna tur a awm rih lo. Tunah khum 277 a awm mek a, ward dang pakhat, khum 30 awmna pawh kar hnih chhungin an peih hman rin a ni," an ti.

Ṭhutkhawma tarlan danin, Covid-19 veite zingah nau pâite an ngaihtuahawm bik a, co-morbid anga ngaih an ni. An taksain natna a do theihna a chak loh bik avangin an na zual hma bik a, mi pangngai aia an thisen a khal/khang duh bik avangin an fimkhur hle a ngai a ni.