CM-in Remna Ni-ah mipui chibai a bûk

Chief minister Zoramthanga chuan nimin khan vawiin Remna Ni pualin thuchah a tichhuak a, Mizoram mipuite Remna Ni chibai a bûk.

Covid-19 buaina leh hripui karah sorkarin duh anga ropui taka a huho a hman theih loh thu a sawi.

CM Zoramthanga chuan, Mizoram remna chu India hmarchhak state leh ram dangte'n entawn atana an duh leh neih ve an duh a nih thu sawiin, "Mizoram buai laia kan buaizia rilruah a lo lang a, India ram hmun dangah leh khawvel hmun tam taka an tih loh chu hman a ni. India ram leh a chhehvelah hian Mizoram buai anga khatiang tih kha a la awm lo," a ti a; kohhran, political party, tlawmngai pawlte leh mipui ṭawngṭaina avangin remna a thlen thu a sawi.

Remna siam hnuah silai leh silaimu pakhat pawh tlànsan loin, India sorkar nena inremna chu tun thlenga vawn nun a nih thu sawiin Zoramthanga chuan, "Mizoram kan remna ang duh vein, palaia ṭang turte'n sàwm kan ni. Mizoram inremna hi mipui ṭawngṭaina, political party-te leh NGO leh mi hrang hrangte thawhna leh ṭawngṭaina rah a ni," a ti.

Chief Minister chuan, "Mizoram inremna kan neihah hian Mizoram chu union territory aṭangin state-ah hlàn kai niin, inhumhalhna ṭha bik Article 371G leh a dangte ṭha tak tak kan nei. Hei hi Mizo mipuite'n kan duhthusam thlapa siam a ni lo a, India sorkar duhthusam pawh a ni lo. Pathianin kan sírtlûk tawnna tur inremna min pek niin kan hria," a ti a; duhthusam ni lo mah se, Pathianin a tâwk a tih a nih thu a sawi.

Zoramthanga chuan, Covid-19 lèn chhungin harsatna dang - vawk hri, ṭhenawm ram buaina, kângmei leh a dangte'n Mizoram a tihbuai thu te, Mizoram mipuite chu Pathian hnenah ṭawngṭaiin, ngaihtuahna thar nen hma lam thlir tura a duh thute a sawi bawk.