Kolasib leh Serchhipah press accreditation card hlân

Serchhipa IPRO K Saitluanga chuan nimin khan Serchhip district-a accredited journalist 12 hnenah press accredi-tation card a hlân a; Kolasib IPRO Dr Hmingthanzuala pawhin Kolasib district-a accredited journalist 13 hnenah nimin khan IPR conference hall-ah press accreditation card a hlan bawk.

Press accreditation card pek chhuah mi 12 zinga 10 chu Serchhip khawpuia mi an ni a, mi dang pahnih chu Thenzawl khuaa mi an ni. Kolasib district-ah hian ni tin chanchinbu chhuak 10 leh chawlhkar tin chhuak chanchinbu pakhat a awm.

K Saitluanga chuan, tunlaiah mi tinin media hna an thawk ta emaw tih mai theih turin media hmanrua a ṭha tawh tih a sawi a, "Chutih rual chuan, tuna accreditation pek tharte erawh chu sorkar hriatpui thlap journalist in ni tihlanna a nih avangin a hlu hle a ni," a ti a; mi dangte chunga inlekna leh an harsatna thlen nan hmang lo a, mipui rawngbawlna atana hmang tur leh accredited an nih ang ngeia an rintlakzia tilang ṭhin turin a chah.

Dr Hmingthanzuala chuan, thuthar lâk khawm leh mipui hnena thehdarh hna chu hna zahawm, thiamna leh inpekna thûk tak ngai a nih thu sawiin, "Sokarin rintlaka a ngaih accredited journalist 13 lai Kolasib district-ah nei thei in awm hi a lawmawm," a ti a, an rintlakna leh zahawmna vawng nung zel turin a fuih.