Vawk thi neitute zangnadawmna pe turin ngen

Serchhip Town Piggery Cooperative Society Ltd. (STPCS) chuan, African Swine Fever (ASF) avangin Serchhip district-ah vawk 891 a thi tawh tih sawiin, hri vanga vawk thi neitute zangnadawmna pe turin Mizoram sorkar an ngen.

Nimina STPCS thuchhuah chuan, mi tam takin chhungkaw innghahna atan vawk an vulh tih tarlangin, "Neih thinglung kháwnga leite leh a ṭhen chuan loan laa vulhte kan ni a, kan mangang tak meuh. Bank loan kan lâkna hotute hnenah min ngaihhnathiam dan kawng zawng turin kan ṭah-awh a ni," a ti a; sorkarin hma a laksak theih ringin beiseina sang tak nen an thlir reng thu a tarlang.

STPCS tarlan danin, AH&Vety minister Dr K Beichhua'n June 25, 2021-a Nghalchawma mimal vawk farm a tlawhnaah, vawk hri léng meka vawk tihhlum neitute tan zangnadawmna sorkar laipuiah dilpui tum a nih thu a sawi a; AH&Vety department-a thawkte pawhin vawk thi zingah tihhlum chawp ni lo leh hri vanga damloa amaha thite report-ah an thliar hrang zel tawha hriat a ni.

Vawk pùl hri tuarte ṭanpuina chu sum awm sa, indaih lo taka hman tur ni lo, sorkar laipuia dil chauh tur a nih chuan, tihhlum chawp chauh ni lo, hri vanga tuartu zawng zawng, natna vanga amaha thi leh tihhlum chawpte thliar loin, zangnadawmna chu Mizorama ASF vanga vawk thi tuartu zawng zawngte tan ngaihtuahsak turin Mizoram sorkar an ngen a, "Kan ngenna anga zangnadawmna kan hmuh theih chuan kan lawm hle ang," an ti.

STPCS chuan, an manganna chu AH&Vety Minister leh department hotute hmaichhana sawipui duh viau mah se, hripui léng karah zin veivah a harsat avangin press release hmanga an duhnate an puanzar chu thu tlingah ngaia tihhlawhtlinsak turin Mizoram sorkar an ngen tih an tarlang bawk.