KHAWTHLIR

MBCC an lawm
Sumdawngte intèl khawmna, Mizoram Business Coordination Committee chuan thuchhuah siamin, Transport department-in lirthei chhiah leh a kaihhnawih chi hrang hrangte Covid-19 avanga February-September, 2021 chhung ngaihhnathiamna a siam chu lawmawm an tih thu an tarlang. MBCC-ah sumdawng pawl 71 an awmkhawm.

MLA-in hawng
Champhai North bialtu MLA Dr ZR Thiamsanga chuan nimin khan MLA fund hmanga sak Champhai Vengthlang North YMA thlànmuala kudam sak thar a hawng. Kudam hi Rs. 3,00,000 hmanga sak a ni.

Containment zone
Aizawl DC chuan nimin khan Saron Veng leh Electric Veng hmun ṭhenkhat, containment zone-a puan tawhte a hlip a, hmun ṭhenkhat dang erawh conainment zone a la ni chhunzawm zel. Lunglei Bawrhsap pawhin Lunglei Venglai hmun ṭhenkhat, chhungkaw 32 awmna chu containment zone-ah a puang thar a, Electric Veng hmun ṭhenkhata containment zone a hlîp thung.

MLA-in tanpui
Tuirial bialtu MLA Andrew H Thangliana chuan June 28, Thawhṭanni khan a bial chhunga Jordan Centre CCC tlawhin, Covid-19 veite mamawh chi hrang hrang leh Rs. 10,000 a pe. Jordan Centre CCC-ah hian hripui vei 219 enkawl mêk an ni.

Souvenir tlangzarh

Kawrtethawveng High School-in an kum 50-na, golden jubilee puala souvenir an buatsaih chu nimin khan Hachhek bialtu MLA Lalrindika Ralte-in an inah a tlangzarh. Kawrtethawveng H/S hi kum 1970-a din a ni a, zirtirtu pali leh zirlai 83 an awm mek. Kumin aṭangin higher secondary hawn thar a ni a, science leh arts subject zir theih a ni.

SRH-ah mi 17-in Ventilator hmang
State Referral Hospital (ZMC) ICU-ah Covid-19 vei mi 28 an awm mek a, chu'ng zinga 17 chu ventilator hmanga enkawl an ni. SRH-ah hian nimin khan hripui vei mi 15 dah luh an nih laiin, mi 22 chhuahtir an ni. Nimin tlai dar 5 dinhmun angin, hripui vei mi 205 enkawl mek an ni a, mi 177 chu ward-ah awmin, an zinga 55 chu oxygen pek mek an ni.