Champhaiah Covid-19 do dan sawiho
Medical Operational Team (MOT) chairman Dr ZR Thiamsanga, MLA hoin nimin khan Champhai DC conference hall-ah sorkar hotute'n Covid-19 chungchanga hmalakna leh pawimawhte an sawiho.
Dr ZR Thiamsanga chuan, Covid-19 donaah sorkarin theihtawp a chhuah nia sawiin, "Khum 150 awmna ZMC-ah khum 247 a awm tawh a, khum 60 dang siam belh turah 30 peih a ni tawh. A tira ICU awm zat ICU pangngai leh surgical ICU belhkhawm 13 awm ṭhin chu 34 a ni tawh a, Paediatric ICU buatsaih mek a ni bawk," a ti. Champhaiah TrueNat Quattro dang pakhat bun leh tuma ruahman a nih thu a sawi bawk.
Thawhhona ṭha tak avanga Covid-19 hrileng lungrual taka do let a ni chu chhuanawm a tih thu sawiin Dr ZR Thiamsanga chuan, "LLTF/VLTF, NGO, kohhran, sorkar leh mipuite ṭanrualna avangin state dang khaikhinin dinhmun ṭha zawkah kan awm theih phah. Tha thlah loa beih chhunzawm zel a ṭul," a ti.
MOT Chairman chuan district hospital inpuahchahnate ṭha a tih thu sawiin, "Covid-19 hrileng thawh thumna turah ṭhahnemngai taka inpuahchah lawk a ṭul," a ti a, mamawh an neih angahte theihtawp chhuahpui turin sorkar a inhuam reng thu a sawi.
Champhai DC Maria CT Zuali tarlan danin Covid-19 thawh thumna thleng thei atan inbuatsaih a ni a, DDMA kaltlangin oxygen regulator 50 leh TrueNat kit lei tum a ni. Champhaia kohhran hall paruk (khum 116 awm theihna) chu CCCC atan biak fel a ni tawh.
Additional DC Henry C Lalrawnkima'n Covid-19 donaa ṭanpuina sum hmuh zat leh hman dan a sawi a; CMO Dr R Lianmawia'n vaccine pek dan a sawi thung.
Meeting chuan kum 18 chin chunglam vaccine la thei turten kim taka vaccine an lak vek theihna tura hmalak zel nise, an ti. Covid-19 laka himna tura tih makmawh hrang hrangte uar zawka inhrilhhriat a, ramria duty post siamte nakin zela chhawr ṭangkai theih tura cheithat ṭha tih a ni bawk.
Dr ZR Thiamsanga hian meeting zawh hnu hian a bial chhung Zote khua tlawhin VLTF-te hnenah Rs. 10,000, silpauline, hand sanitizer leh face mask-te a hlan bakah, VLTF member ramri venga duty rul chuk tuar Lalhundika, Zote Branch YMA vice president chu Rs. 1,000 in a kan bawk.