MNF-in Transport Minister an chhuang

MNF party chuan, Transport minister TJ Lalnuntluanga hmalakna avangin lirthei chhiah leh permit chi hrang hrang, certificate leh license thih hun tawhte chu September 30, 2021 thleng pawhsei a nia sawiin, chhuanawm an tih thu an puang.

Covid-19 léng thawh hnihna avangin Mizoramah thla hnih chuang inkhârkhip a ni tawh a, office kal mumal theih a ni lo tih sawiin MNF thuchhuah chuan, "Lirthei neitute document hrang hrang renew theih a ni lo a, two wheeler taxi permit tihfel hun tawh la tifel thei si lo, thi mai tur thlengin a thih a hun a, lirthei neitute an mangang tawh a ni," a ti a; chutih laiin, sorkarin ruahmanna a siam thu a tarlang.

MNF tarlan danin, lirthei fitness certificate, permit hrang hrang, driving license, registration certificate, passenger and goods tax, road tax leh document dangte February 1, 2021 aṭanga chhiar ṭana September 30, 2021 thlenga thi tawhte leh thi turte chu sorkar thupek angin a la nung (valid) anga pawm a ni dawn a ni.

Transport Minister hmalakna lawmawm an tih thu sawiin MNF chuan, "Hemi hun chhunga motor document thite chu late fee ngaihdam a ni dawn leh zelte hi a lawmawm hle. A hun takah Mizo mipui, lirthei neitute harsatna hrethiama a taka hma la nghal minister Pu TJ Lalnuntluanga hmalakna hi kan chhuangin ropui kan ti takzet a ni," an ti.