Mizoram leh Assam police-te Vairengte Aitlangah an awm : State pahnih CS-te an inbe dawn

Mizoram leh Assam ramri bul, Mizoram chhung Aitlang ramah Mizoram leh Assam police eng emaw zat an awm mek a, buaina chhuak erawh a awm lo. Thil thleng leh ramri chungchangah state pahnih chief secretary-te July 9, 2021-ah inbe tura ruahman a ni.

Assam police 100 chuang chu June 29, Thawhlehni khan Hailakandi SP hoin Vairengte tui lâkna, Vairengte aṭanga km. 4 vela hlá Aitlang hnâr lamah inkulh an tuma hriat a ni a, Mizoram police-te leh Vairengte mite'n an dan avangin an inkulh thei lo a, mahse, an kîr duh lo.

An ram mi leh sate aṭanga complaint an dawn angin, Assam police-te hian an ram chinah Mizote'n huan/lo/ram an siam nia an sawi an bawhzui nia hriat a ni.

Mizoram police leh Vairengte khawtlang chuan Assam police-te chu Ramhluna huanah an lo dang a, inkulh an tumna hmun chu Chhandama huan a ni. Assam police lam hian Thawhlehni zan khan Mizoram police leh khawtual mite awm mang loh laiin an nawr a, Chhandama huan an thleng.

Nimin khan Mizoram police tam zawkin Aitlang ram an pan ve nghal a, mi 100 chuangin Chhandama huanah an awmchilh ve nghal. He thu ziah lai thlengin Chhandama huanah state pahnih police-te an la awm ve ve a ni.

Nimin khan Aitlang ramah Kolasib DC Dr H Lalthlangliana leh Hailakandi DC-te an inbia a, buaina chhuak a awm lo.

Ruahmanna an siam dan chuan, July 9, 2021-ah state pahnih chief secretary-te an inbia ang a, chumi hma chuan state pahnihte'n Aitlang ramah hmalakna neih loh tur a ni.

Aitlang hmuna thil thleng vang hian nimin khan minister of state Lalchhandama Ralte, bialtu MLA Lalrinsanga Ralte, C Lalmuanpuia, MLA leh DIG Lalbiakthanga Khiangte ten Vairengte an pan a, khawtlang hruaitute leh sorkar official-te nen an inkâwm.

Aitlang ram hi Vairengte khaw chhung aṭangin km. 4 vel a ni a, lirthei kal theih chin bakah kein km. 2 vel kal a ngai. Ram hi hmunphiah chìnna atan hman ṭhin a ni.