HSSLC 2021-ah complaint a tam

Mizoram Board of School Education (MBSE)-in tun hnaia HSSLC Examination 2021 result a tihchhuahah mahni mark hmuh zat a dik lo nia ring mi 100 chuangin complaint an thehlut tawh.

HSSLC result-ah hian complaint chi thum thehluh theih a ni a, fail zingah aiin pass zingah complaint thehlut an tam zawk. Complaint thehlut zingah distinction-a pass tura inngai eng emaw zat an tel a, zirlai eng emaw zat chu an hlawhtlin laiin, hlawhtling lo pawh an awm nual.

Hetihlai hian, phaia lehkha zir zawm tum eng emaw zatin migration certificate an dil a, MBSE-in original certificate an la pek chhuah loh avangin migration certificate pawh la chhuak loa phaia kal an awm nual a, an buai phah viau nia thu dawn a ni.

MBSE chairman JH Zoremthanga chuan, zirlai mark belh sual a awm leh awm loh enfiah nan post publication scrutiny dil theih a nih thu leh chu chuan mark pek belh lam a kawh loh thu a sawi a; paper check leh re-valuation dil leh theih a ni a, dil turin mark 60% tal hmuh a ngaih thu leh, chhànna (answer paper) en duh tan photo copy a dil theih thu a sawi bawk.

HSSLC 2021-ah hian July 5, 2021 thleng complaint thehluh theih a ni a, complaint-te chu examiner, scrutinizer leh tabulator-te'n an endik ṭhin a, complaint fee zirlaiin an pek aṭangin an hah man pek a ni ṭhin. Paper zawng zawng endik leh vek man chu Rs. 1,000 a ni a, answer paper photo copy lak man chu Rs. 300 niin, mark hmuh zat belh ṭhattir leh man chu Rs. 150 a ni.