Ráltlânte ṭanpuina turah MHA-in thu an la nei lo

Mizoram sorkarin Myanmar buaina avanga Mizorama rawn ráltlânte chhawmdawlna pe tura a ngen chungchangah sorkar laipuia Ministry of Home Affairs (MHA) chuan thu leh hla a la nei lo. Myanmar ram dep Tuipuiral huam chhungah nimin thleng khan ráltlân 1,770 vel an awm mek.

Vanglaini palai zawhna chhángin Myanmar ráltlânte chungchanga sorkar laipui dawra Delhi-a kal H Ram­mawi, State Planning Board vice chairman chuan, theihtawp chhuaha hma an lak thu a sawi a, "Ráltlân an pun zel avanga harsatna kan tawh thu leh hetiang ringawt chuan kan tlin tawh loh thute kan zuk thlen a ni," a ti.

H Rammawi chuan, MHA an dawr hmasak thu sawiin, "MHA lamin thuràwn min pek angin Ministry of External Affairs (MEA) kan dawr leh a ni. MEA lam chuan ráltlânte chhawmdawlna tur hi min pek ngei tur thu leh sum erawh MHA aṭanga pek chhuah tur a nih thu an sawi," a ti a, MHA lamin thu leh hla an la neih leh loh thu a sawi.

Myanmar aṭanga Mizo­rama ráltlânte hi hmun hrang hrang aṭanga rawn lut an ni a, an luhna pui ber, Champhai district-a Tuipuiràl huam chhungah ráltlân mi 1,473 an awm mek a; Ṭiau lui kam, Mizoram chhungah mi 300 vel an awm mek bawk. Tui­puiralah hian khaw 23 a awm a, chu'ng zinga khaw 22-te chuan ráltlân mikhual an nei a ni.

Tuipuiral group YMA hruaitute sawi dan­in, râltlân zinga eng emaw zat chu an luhnaa chhungkuate'n an lo mikhual a, in luaha khawsa­te pawh an awm. Farkawn, Vaphai leh Zawlsei khuaahte an awm lailâwkna tur relief camp sak a ni.

Tarlan tawh ṭhin angin, Myanmar aṭanga Mizorama ráltlânte zingah chhungte bèl eng emaw zat an awm a, chhungte belh tur nei lote chu YMA, MZP leh an awmna khawtlangte'n ṭanpuina pein an chhawmdawl ṭhin a ni.