Dawr hawn hun tidang-lam turin sorkar ngen

Mizoram Electrical Merchant Association (MEMA), Mizoram Hard­ware Dealers Association (MHDA) leh All Mizoram Cement and Iron rod dea­lers Association (AMCIRDA)-te chuan thu­chhuah inṭâwm siamin, electric bungrua, balu, leirawhchan, iron rod, cement leh in sakna bung­raw dawrte hawn hun tidang­lam turin sorkar an ngen.

MEMA, MHDA leh AMCIRDA-te chuan, sorkarin SOP thar a siamah an dawrte hawn hun atana tih zing dar 5-9 chu tihngaihna a awm lo tih sawiin, "Ram ṭhan danin zing thawh tlai a hril zel a, Mizote pawhin zing hma lutuka dàwra thil lei kan tlin lo. Zing dar 8 aṭangin customer hmuh ṭan a ni a, tuna timing ang hi chuan bungrua packing, hmanrua test ngai nen kal ngaihna thlâwt a awm lo a ni," an ti a; bungrua enchhin, sawngbawl leh lirtheia hlân chhungin hun tiam a ral vek dawn niin an sawi.

Veng hla tak taka dawr neite an nih thu leh thawktute hmun hla tak taka awmte an nih thu sawiin pawl pathumte chuan, "SOP thar hian buaina zakhua min thlen a, sorkarin min tihdanglamsak se kan duh tak meuh. Nilénga ni hnih chauh hawng tur emaw, ni tin chhun dar 12 thleng emaw tal min inhawntir turin kan ngen a ni," an ti.

Covid-19 vaccine la lo dâwr nghak thei lo tura tih pawh tidanglam tura sorkar ngenin, "Kan hnathawk tam ber hi thingtlang mi an ni a, vaccine la lo an la tam hle a ni," an ti a; tun dinhmunah an tan a harsat thu an sawi.

MEMA, MHDA leh AMCIRDA-te chuan, sorkarin SOP a siam apiang sawisel loin an zawm ṭhin nia sawiin, "Tun ṭuma mi erawh tidanglam hrâm turin kan ngen a, lungawi lohna lantir emaw, PIL file emaw ngai loin inrem takin min kaltir hrâm turin kan ngen a ni," an ti.