Inkhuahkhirhna thlahdul a ni

Mizoram sorkar chuan Covid-19 léng vanga inkhuahkhirhna a thlahdul hret a, mihring sumdawnna phur chi lirtheite an tlân (service) theih tawh dawn bakah, inkhelh phal a ni tawh.

Biak-ina inkhawm pangngai leh zirna-inte erawh hawn phal a la ni lo a, zan lamah curfew puan chhunzawm zel a ni dawn.

State Disaster Management Authority hnuaia State Executive Committee (SEC) chuan June 29, 2021 zan khan Covid-19 donaa inkaihhruaina, Standard Operating Procedure (SOP) thar a tichhuak a, June 30 zing dar 4 aṭanga July 15, 2021 zan dar 12 thleng hman tur a ni.

SEC order chuan, inkhuahkhirhnain Covid-19 darh zel tur a véng tih tarlangin, "Hri kai zat (positivity rate) chhûtin, inkhuahkhirhna kalpui mek hian nasa takin min veng a ni tih a lantir a, chutih rualin, inkhuahkhirhna rei tak kalpui hian ni tin ei leh bàr zawn kawngah nasa taka nunphung a tihkhaihlak avangin, ei leh bar kawnga kan dinhmun a tlakhniam lutuk loh nan eizawnna hna ngaihtuah chunga inkhuahkhirhna kalpui chhunzawm ṭha tih a ni," a ti.

SOP tharah hian a hmasaa mi hman chhunzawm awm mah se, eng emaw zat tihdanglam leh thlahdul a ni a; order hmasa zawng zawng a luahlàn nghal a ni.

SOP thara langsar zualte
Mizoram pum atan:
Biak-ina inkhawm phal a la ni lo a, zing leh tlaia ṭawngṭai neih erawh phal a ni.
Zirna-in, gym/spa, public park, picnic spot, adt. hawn phal a ni lo.
Infiamna indoor-ah mi 10 aia tam lo leh outdoor-ah mi 25 aia tam loa tih phal a nih laiin, inelna (tournament) huaihawt phal a ni lo.
Mipui punkhawm (anniversary, birthday, adt). huaihawt phal a ni lo.
A huhoa chhuahvah, lui kal, trekking, hiking, adventure sports, adt. phal a ni lo.
Mimal leh sorkar construction work thawh phal a ni.
Ina thil siam (home based industry) carpentry, steel fabrication, bakery, puanṭhui, puantah, adt. phal a ni.
Lirthei workshop leh tyre works-te hawn phal a ni.
Dawr hrang hrang hawn chhâwk tura tih a ni.
District khawpui dang leh khaw dangah chuan DC-te'n ruahmanna an siam ang.

Aizawl khawpui bik atan:
Zing dar 4-7 leh tlai dar 5:00-6:30 inkarah walking/cycling exercise tih phal a ni.
City bus, taxi leh two wheeler taxi-te hunbi neiin an tlân dawn a, zan curfew chhungin tlân phal a ni lo.
Sorkar office-ah group A officer 100% leh staff dang zawng 50% emaw, a ṭul dan azirin a aia tam kal theih a ni.

SOP tharah hian thil thar eng emaw zat a awm a, SOP hmasa lama phal tawh sate chu phal zui a ni tlangpui.

Inkaihhruaina thara tarlante
(SOP-a tarlante tihlan vek a ni lo)

Mizoram puma hawn/tih phal lohte:
1. Sakhaw biakna hmun hawn leh inkhawm.
2. Zirna-in, gym/spa, public park, picnic spot, adt.
3. Infiamna lama inelna (tournament) adt. (indoor & outdoor)
4. Mipui punkhawm (anniversary, birthday, adt. lawm).
5. A huhoa páwna chhuah, lui kal, trekking, hiking, adventure sports, adt.

Mizoram puma hawn/tih phalte:
1. Biak-ina zing leh tlai ṭawngṭai neih.
2. Sport practise - indoor-ah mi 10 aia tam lo leh outdoor-ah mi 25 aia tam lo.
3. Construction works (mimal leh sorkar)
4. Animal disease control programme, vety hospital, dispensary, clinic, sahuan, hatchery, feed mill/ran chaw leh slaughter house.
5. Bank, non-banking financial institutions, insurance, ATM, post office leh postal services.
6. Child and women helpline service, OSC, OST leh ART centre.
7. Nau pâi, nausen pawm leh naupangte hnena nutrition sem leh kudam aṭanga phurh chhuah leh sem.
8. Kawng laka lirthei chhia siamtute (automobile dealer leh workshop hnathawkte a huam), identity card an keng tur a ni.
9. In a thil siam (home based industry) -carpentry, steel fabrication, bakery, puanṭhui, puan tahna, adt.
10. Lirthei workshop leh tyre works.
11. Courier service, e-commerce leh home delivery.

Dawr hawn dan tur:
1. Dawr nghaktu leh hnathawktute vaccine dose khat tal la tawh an ni tur a ni.
2. Veng danga dawr/mimal sumdawnna pan turte'n an awmna LTF/VTF phalna (movement permit) an ken a ngai.
3. In sakna leh electric bungraw dawrte Aizawlah Thawhṭanni, Nilaini, Ningani leh Inrinni zing dar 5-9 inkarah hawn phal a ni a, hmun dangah chuan DC-te ruahmanna angin hawn tur a ni.
4. Aizawlah eichawp dawrte ni tin zing dar 9 thleng hawn theih a ni a; khaw dangah chuan DC-te ruahmanna angin hawn tur a ni.
5. Damdawi leh thlai chi dawr ni tin hawn theih.
6. Aizawla dawr leh bazarte DC leh LTF-te ruahmannain group A, B leh C-ah ṭhen a ni ang a, zing dar 5 leh tlai dar 5 inkarah hawn phal a ni.
Group A - Thawhṭanni leh Ningani
Group B - Nilaini leh Inrinni
Group C - Thawhlehni leh Zirtawpni (sa, thlai, thei leh pangpar bazara zawrh chi telin).
8. District khawpui leh khaw dangah DC ruahman angin dawr leh bazar hawn theih a ni.

Aizawl khawpui bik:
1. City bus, taxi leh two wheeler taxi-te intlan chhawktir a ni dawn a, curfew lain tlân chhuah phal a ni lo.
2. Walking leh cycling exercise-te zing dar 4-7 leh tlai dar 5:00-6:30 inkarah tih theih a ni.
3. Mimal company/office - consultancy service, adt. te DC leh LTF ruahmanna angin kar khatah ni hnih hawn theih.
4. Sorkar office-te group A officer 100% leh a dang zawng 50% emaw, ṭul bikah a aia tam emaw kal theih. Office kai lote leh Covid-19 duty-a tel lote chu in aṭangin hna an thawk ang.

Aizawla sumdawnna lirthei:
1. Lirtheiah seat awm zat aia tam mi phurh phal a ni lo a, lirthei khalhtu leh conductor-te'n Covid-19 vaccine dose khat tal an la tawh tih finfiahna an ken a ngai.
2. ACBOA-in routine an siam angin ni khatah city bus 80 aia tam lo an tlân thei. Ni tina service turte registration leh bus serial number-te Traffic SP hnenah an thehlut tur a ni.
3. Taxi-te an intlan chhâwk dawn a; sticker A-te Nilaini leh Inrinniah, sticker B-te Thawhṭanni leh Ninganiah, sticker C-te Thawhlehni leh Zirtawpniah an tlân thei.
4. Two wheeler taxi-te hlawm ngaah ṭhenin an intlan chhâwk ang. Tlân theih nite - Nilainiah sticker A, Ninganiah sticker B, Zirtawpni leh Thawhlehniah sticker C, Inrinniah sticker D, Thawhṭanniah sticker E.

District khawpui leh khaw dang:
1. Zing/tlai walking leh cycling exercise-te DC ruahman angin tih theih.
2. Mimal company/office, consultancy services, adt. te DC ruahmanna angin hawn theih.
3. DC ruahmanna angin sorkar hnathawkte an kal ang.
4. Eizawnna lirtheite DC ruahmanna angin an tlan thei.