Assam-Mizoram ramri buainaah Central force hman a ni ang - Assam CS

Assam Chief Secretary leh DGP Bhaskar Jyoti Mahanta te chuan Assam Chief Minister tirh angin November 3, Thawhlehni khan Lailapur an tlawh a, tun hnaia Vairengtea thi ta Intiaz Ali chhungte an tlawh nghal. Nimin khan Silchar-ah Cachar, Hailakandi leh Karimganj DC leh SP-te bakah, heng district pathuma Divisional Forest Officer-te an kâwm a, an district chhunga dan leh thupek dinhmunte an thlirho a ni.

Nimina thuthar thehdarhtute'n an kawmnaah Assam Chief Secretary chuan, "Sorkar laipuiin state pahnih ramri-ah central force dah tur thu an sawi tawh a, tun aṭanga ni rei lo têah an thlen beisei a ni. Hei hi ramria remna leh muanna a thlen theihna tur leh mipui himna tura tih a ni," a ti  a, central force-te tirhna tur order pawh tihchhuah a nih tawh thu a sawi.

Assam Chief Secretary hian Assam ramri dik tak aṭanga inchi khat pawha an tawlh loh thu sawiin, "Dan ang taka kan ramri dik (constitutional boundary) hi kan chiang a, Mizoram a pian dawna Mizoram Act of 1986-ah khan chiang taka tarlan a ni a, he ramri hi kan dinna a ni a, kan tawlh lo ang," a ti.

Jishnu Baruah chuan, Mizoram hruaitute nen an indâwr reng tih sawiin, "Kolasib DC chauh hi kan dâwr lo a, kawng hrang hrangin kan indâwr reng. Sorkar laipuia Home Secretary nen kan inbe reng a, Mizoram Chief Secretary pawh kan inbia. Hei bakah hian Assam state hruaitute leh Mizoram hruaitute pawh an inbe pawp reng a ni," tiin, ram hruaitute an inbiak reng thu a sawi.

Assam Chief Secretary chuan, inbiakna hmangin remna a thlen theih ngei a beisei thu a sawi a, chumi a thlen theihna turin theihtawp an chhuah reng thu a sawi bawk.

Assam DGP chuan, ramri buaina thlengah Assam police-in dan an zawm tlat thu sawiin, "Dan kan zâwm a, kan bawhchhe lo ang. Chutih rualin, kan ram leh a mipuite dikna hi kan humhim tlat dawn a ni," a ti a, thuneitu sangte kutah thil awm dan an thlen tawh thu a sawi.

Hetih lai hian, North Karimganj bialtu Congress MLA Kamalakhya Dey Purkayastha chuan nimin khan buainaa mawhphurtu ber chu Himanta Biswa Sarma a nih thu a sawi a, "Himanta hi NEDA hotupa a ni a, Assam hi BJP rorelna state niin, Mizorama roreltute hi NEDA-a BJP thawhpui an ni," tiin, state leh state inbiaka chinfel theih a nih thu a sawi a ni.

North Karimganj chuan, Lailapur mi thihna chungchang sorkarin a sawi chhuah loh avangin Assam sorkar a dem thu a sawi a; Assam sorkar chu Mizoram lam dem ngam lo leh an ká hupna tura mitthi chhungte hnena cheng nuai 5 peah a puh bawk.