KHAWTHLIR

TNT-ah mi 527 an negative tawh
IDSP chuan nimin khan TNT CCCC-ah Covid-19 exit testing neiin, hripui vei hmuh chhuah tawhte dinhmun hriat nan swab sample an endik a; hripui vei tih finfiah tawh zinga mi 19 chiah an la positive tih hmuh a ni. Sorkar thuchhuah tarlan danin, TNT-a swab sample endik nawnnaah hian Pangpar Huanah mi 165, naupang ward-ah 106 leh Centre 1-ah mi 275, an vaiin mi 546 endik a ni a; mi 527 an fihlim tawh laiin, mi 19-in hripui an la vei a ni.

Containment zone
Saron Veng hmun ṭhenkhata containment zone chu Aizawl DC Dr Lalhriatzuali Ralte-in nimin khan a hlîp a; hmun ṭhenkhat, containment zone-a la ni chhunzawm a awm bawk.

Khawzawlah zirho
Khawzawl DC Zothanmawia hoin June 29, Thawhlehni khan Khawzawl district-a MJA member leh cable TV neitute'n Covid-19 darh zel tur donaa hmalakna chungchang an zirho. Khawzawlah hian sorkar quarantine facility 31, community quarantine facility 36, hotel/paid QF pakhat leh institutional QF pahnih a awm a; Covid-19 vaccine dose khatna la tawh mi 7,608 an awm a ni.

YMA-in tanpui
YMA Sub-Headquarters, Serchhip hruaitute chuan nimin khan Covid-19 vei mi 21 awmna Serchhip Darnam Vengah chhungkaw 30 chuang tan buhfai leh chawhmeh ṭhahnem tak an pe. YMA hruaitute hian Serchhip leh Keiṭum inkara kawngpui zauh hna thawh mek an enfiah nghal bawk.

Kap ngam turin sorkar phût
Joint Action Committee on Inner Line Reserved Forest Demand, Mizoram chuan thuchhuah siamin, Assam police leh mi eng emaw zatin June 29, 2021-a Vairengte Aitlang ram an lut leh mimal thlâm leh huan thlaite an tichhia chu an dem thu an tarlang a, "Assam sorkarin buaina an rawn siam hian kan sorkar pawh ngawi mai lo a, hma laa ram leh hnam humhalh nan kan police force-te chêt chhuahtira kap ngam hial turin kan phût a, mipui nawr leh mipuiin hma an lak khalh tawh ngai lohna tura che vat ṭhin turin kan phût bawk," an ti.