Suma harsatna neite tan a man pe loin Swab sample endik theih a ni

Health department chuan Covid-19 lèn nasat chhunga swab sample endik dan turah nimin khan hriattirna a tichhuak a; sorkar din Covid Testing Kiosk-ah sum harsat vanga test man pe thei lote tan man chawi a ngaih loh thu a tarlang.

Sorkar thuchhuah tarlan danin, Mizoram sorkarin Covid-19 veia rinhlelhte rang taka an dinhmun hriat vat leh positive-te rang taka dah hran a, a ṭul anga enkawl nghal zel a duh avangin kalphung thar duan a ni.

Health department chuan, RAT hmanga swab test tihna tur kiosk a tam thei ang ber siam tum a ni a, veng leh khuaa thawktu tur leh a hmunhma remchang awm theihna apiangah din tur a nih thu a tarlang a, "Chutianga tih ṭulna leh remchang nei veng leh khuaa task force-te'n anmahni bialtu chief medical officer-ah report zel tur a ni a, CMO-in a ṭul angin a bawhzui nghal zel ang," a ti.

Health department tarlan danin, veng/khaw dang aṭanga swab test mamawh rawn pantute chu hnar loh tur a ni a, test ti turte'n an hriselna dinhmun sawi chiangin, an veng LTF/ VTF-te hriattir hmasak zel tur a ni.

Covid-19 symptom nei lo nia hriatte chuan an remchan dan angin kiosk an pan thei a; symptom neia inringhlelte chuan kiosk pan mai loin, LTF leh bialtu Health department official-te'n swab sample lâk dan tur an rêl anga awm tur a ni.

Sorkarin a din Covid testing kiosk-ah swab test man Rs. 200 a ni a, a man pe theite'n pek zel tur a nih rualin, sum harsat vanga pe thei lote tan man chawi a ngai lo. Audit-ah buai a awm lohna turin kiosk-a thawktute'n test man pe leh àwltirte chu SRF ID nen an chhinchhiah zel tur a ni.