Myanmar ráltlânte mamawh BJP-in Central-ah thlen zel an tum

BJP, Mizoram Pradesh president Vanlalhmuaka chuan, Myanmar aṭanga Zo hnahthlak Mizorama ráltlânte tan an tih theih ang ang sorkar laipuiah an thlen zel dawn thu a sawi.

Vanlalhmuaka hian nimin khan an pisaah thuthar thehdarhtute a kâwm a; Myanmar ram buaina avanga Zo hnah­thlak tam tak Mizoramah sahimna turin an luh mek thu sawiin, "Heng kan unaute lo dawngsawng a, ráltlânte lo mikhualtu chhungkua leh khuate chungah lawmthu kan sawi a ni," a ti.

Myanmar aṭanga Mizorama ráltlânte chu Mizote thisen zawmpuite an nih thu sawiin Vanlalhmuaka chuan, "Kan chenna international border-in min ṭhen mah se, kan inunauna leh inlaichinna a ngai reng a ni," a ti a; Zo hnahthlak ráltlânte tan an din reng tur thu a sawi.

Mizoram BJP President chuan, hnam khat, unau leh nunphung thuhmun nihna chu international border politics chung daiha awm tur a ni tih sawiin, "Kan unau ráltlânte chunga central sorkara kan tih theih ang ang chu kan lo thlen ṭhin tawh a, hma kan la zel dawn a ni tih kan unau ráltlânte lo hriatah ka puang a ni," a ti.