MPCC-in Remna Ni pualin chibai bûk

Mizoram Pradesh Congress Committee chuan thuchhuah siamin, Remna Ni, June 30-ah Congress party-in Mizoram mipui chibai a bûk a, zalenna sualtu hnam sipai te, rambuai vanga thi zawng zawngte zahna an hlan nawn leh tih an tarlang.

Kum 20 chhung Mizoram a buai hnuah June 30, 1986-ah MNF leh India sorkarin inremna an ziak a, Mizoramah remna leh muanna a thleng tih sawiin MPCC chuan, "Khatih laia chief minister Pu Lal Thanhawla'n a CM nihna leh a sorkar, remna thlen theihna atana a hlàn ngam kha remna leh muanna a thlen theihna atana thil hlu ber, Mizote leh Mizoram awm chhunga hriat reng hlawh tur a ni. Amah bakah, khatih laia sorkar leh Congress party-a remna atana inhlante inhlanna kha hre reng ila kan duh," an ti.

MPCC chuan, remna leh muanna a thlen aṭanga kum 35 chhungin Mizoramin nasa takin hma a sâwn nia sawiin, "State kan nihpui, rambuaiin a chîm ve loh Arunachal Pradesh nena khaikhin pawhin Mizoram hmasawnna hi a chhuanawm hle. Mizoram aia kum 15 zeta state ni hmasa Manipur, Tripura leh Meghalaya-te nena khaikhin pawhin Mizoram hmasawnna hi dah hniam theih a ni lo," an ti a; kawng tam takah Mizoram an chung en niin an sawi.

Congress party chuan, inremna chu duhthusam ni lo mah se, Mizorama hmasawnnate chu remna leh muannain a hrin chhuah a ni tih sawiin, Ṭhangthar lo awm leh zel turte hian remna leh muanna hlutzia kan hriat nawn fo a ngai a, remna thlentute ngaihhlut nachang pawh kan hriat thar zel kan duh a ni," an ti.