Covid-19: Mizoram dinhmun Hripui vei mi 101 hmuh belh

November 3, Thawh­lehni khan Mizoramah hripui vei mi 101 hmuh chhuah a ni a, Mizo 41 leh hnam dang 60 an ni. Nimin khan hripui laka fihlîm tawh mi 59 chhuahtir a ni thung.

Mizoramah Covid-19 positive mi 2,893 hmuh chhuah a ni tawh a, mipa 2,229 leh hmeichhia 664 an ni. Mi 2,893 zinga mi 2,435 (84.17%) chhuahtir an ni tawh a, mi pakhat (0.03%) thi tawhin, enkawl mek mi 457 (15.80%) an awm.

Covid-19 positive Thawhlehnia hmuh chhuahte chu mipa 81 leh hmeichhia 20 an ni a; ZMC laboratory-a hmuh mi 59, TrueNAT-PCR hmanga Champhaia hmuh mi 30 leh Rapid Antigen Test (RAT) hmanga Aizawla hmuh mi 12 an ni.

Nimin khan Covid-19 negative tawh mi 59 chhuahtir an ni a; enkawlna hmuna chhuahtir dan chu - SRH-ZMC mi 4, ITI CCC 35, Gilead Special School CCC 5, Lengpui CCC 3, Lunglei Pukpui CCC 2, Siaha CCC 1, BIPL, Hnahthial 2, Kutkawk, Hnahthial 5 leh home isolation-a awm 2 an ni.

November 3, Thawhlehni khan ZMC laboratory-ah mi 686, TrueNAT-PCR hmangin district pariatah mi 128 leh RAT hmangin district tinah mi 244-te swab sample endik a ni a, a vaiin sample 1,058 a ni.

ZMC laboratory-a Covid-19 positive hmuh chhuahte chu mipa 46 leh hmeichhia 13, Aizawl district-a swab sample lak vek an ni a, nausen thla 2 telin, a upa ber chu kum 58 a ni. An zinga mi 31 chu Mizoram páwn aṭanga rawn lut thar an ni a, mi 28 chu Mizoram chhunga kái chhâwng an ni thung.

Sorkar thuchhuah tarlan danin, state páwn aṭanga rawn lut zinga mi 30 chu Shivalaya company hnuaia thawk tura Jharkhand aṭanga rawn lut hnam dang mipa, kum 17-54 inkar an ni a, Shivalaya company camp-a awm an ni. Mi dang pakhat chu Republic Venga mipa kum 25, Assam Regiment sipai Rajasthan aṭanga rawn haw, quarantine facility-a khung hran lai a ni a, symptom a nei lo.

Mizoram chhunga kái chhâwngte dinhmun kimchang chu hmun dangah tarlan a ni.

Champhai District Hospital-ah TrueNAT-PCR hmangin mipa 30, mipa kum 18-63 inkar hmuh chhuah a ni a; an vaiin Tarmat company hnuaia thawk tura Jharkhand aṭanga October 25, 2020-a rawn thleng an ni. Tarmat company camp, Melbukah an awm a, symptom nei an awm lo.

RAT hmanga hripui vei hmuh chhuahte chu Aizawla enfiah vek an ni a, mipa panga leh hmeichhia pasarih, kum 15 leh 59 inkar, Aizawl district-a mi vek an ni. An vaiin Mizoram chhunga kái vek an ni a, an dinhmun kimchang chu hmun dangah tarlan a ni.