Taitesena Group YMA an hnatlang

Taitesena Group YMA chu nimin khan Bairabi aṭanga Zamuang kawngpuiah an hnatlang a, kawng chhak leh a sir vela kawng dîpdâltu hrang hrangte an tifai. Hnatlang hi bialtu MLA Lalrindika Ralte-in a ṭawiawm a, hnatlangte hnenah Rs. 5,000 a hlan.

Vanglaini palai zawhna chhangin Taitesena Group YMA president Darthangliana chuan, "Assam lamin kawng an dan avangin Mizoram sorkarin mipui mamawh Tripura aṭanga la lut turin theihtawp chhuahin hma an la niin kan hria a, chuvangin, sorkar thâ tichak turin hnatlang kan ko a ni," a ti.

Darthangliana sawi danin, Taitesena Group YMA chhungah YMA branch 15 an awm a, nimina hnatlangah hian YMA branch pali chu an awmna a hlat deuh avangin an tel lo. Hnatlangah hian branch tin aṭangin mi 20 vel thawk chhuak turin an inhriattir a ni. Hnatlangte thil ei tur chu Kawrthah PWD EE-in a tum sak.