Vairengte auto-rickshaw stand thlangah police BOP dah turin Vairengte VC-te'n CM an ngen

Vairengte Joint VC hruaitute chuan nimin khan chief minister Zoramthanga a pisaah an hmu a; an khawtlangin Mizo IR police-te awmna tur an sakna hmunah border out post (BOP) dah an duh thu an thlen.

Vairengte Joint VC hruaitute'n ramri hrûla khuate'n harsatna an tawh hrang hrang an thlente a ngaihthlak hnuah Chief Minister chuan, boruak ṭha leh muanawm a awm zel theih nan sorkarin hma a lak zel dan a sawi a, "Theihtawp chhuahin sorkarin a tih tur angte chu a ti chhunzawm zel ang," a ti.

Assam leh Mizoram ramria buaina a thlen hnuah Vairengte khawtlang chuan auto-rickshaw stand aṭanga metre 100 vela thlangah Mizo IR police-te awmna tur an sa a, chu chu IR sipaite chuan an luah nghal a ni. Chulai hmunah chuan police BOP dah turin Vairengte Joint VC chuan Chief Minister an ngen a ni.

Vairengte Joint VC chuan, October 17, 2020 zana Lailapur mite'n Mizo IR duty-te an vawm avanga buaina chhuakah sorkar hmalakna an thlamuanpui thu an sawi a, "Khatianga thisen hial chhuaka buainaah khan police leh Vairengte mipui kara tharum thawhna awm miah loa buaina chinfel a ni kha kan lawm em em a ni," an ti.

•    Vairengte khuaah IR company headquarters dah

•    Border Area Development Board din

•    Vairengte Aitlang zau, Sihphui zau leh Mautui lui zaua huan leh leilet nghet nei tam tak an awm avangin periodic patte (WRC patta) an neih ve theihna atan sorkarin hma a lakpui

•    Vairengteah emergency operation centre dah