Manipur-a oil leh gas phurte Kawng lakah an thang mek

Food, Civil Supplies & Consumer Affairs (FCSCA) department-in Manipur aṭanga tuialhthei leh eirawngbawlna gas (LPG) phur tur truck leh tanker a tirhte chuan Aizawl lam an rawn pan mek a, kawng lakah an la thang mek.

Vanglaini palai zawh­na chhangin FCSCA director Dr Lalhriatzuali Ralte chuan, Manipur-ah tuialhthei phur tur tanker panga leh gas phur tur truck pathum tirh a nih thu a sawi a, "A dang pawh tirh belh zel kan tum. Harsatna kan tawh erawh chu, kan lâkna hmun hian Manipur a châwm tel ve avangin duh anga tam kan la thei lo," a ti.

Dr Lalhriatzuali Ralte chuan, oil leh gas lak luhna dang an zawn zel thu sawiin, "Tripura lam aṭang leh Assam vêk aṭangin, Lailapur kaltlang loin lâk luh kan tum," a ti a; an hlawhtlin dawn leh dawn loh erawh hriat theih a la nih loh thu a sawi.

Buhfai chungchanga zawhna chhangin FCSCA Director chuan, "Buhfai hi chu rél hmangin a rawn thleng thei reng a, harsatna kan nei rih lo," a ti.