Assam police-in Mizoram police an nawr kîr : Mizoram police-te puan in an tihchhiatsak

June 30, Nilaini zana Mizoram police leh Vairengte ṭhalaite'n Mizoram police-te awm hmun atana an duhna hmuna puan-in an kaih chu nimin chawhnu dar 2:30 vel khan Assam police-te'n an tichhia. Assam lam hian Mizoram police-te chu an nawr kîr a ni.

Vanglaini thu dawn danin, Vairengte khawtlang hruaitute'n Aitlang rama inkulhna tur hmun atana ṭhaa an hriatah Nilaini zan khan Vairengte ṭhalaite leh Mizoram police-te'n puan-in pathum an kaih a, nimin zing dar 3 velah an kaih zo. Puan-in an kaih zawhah Vairengte ṭhalaite chu an ṭîn a, police-te'n riahbûk chu an luah nghal a ni.

Nimin tlai dar 2:30 vel khan Mizoram police-te'n puan-in dang kaih an tum leh laiin Assam police-te'n an tibuai a, puan-inte chu an tichhiatsak. Assam police-te chuan Mizoram police-te chu an bungrua lâk pawh an phalsak lo a, an duhna china an nawr kìr hnuah an kalsan. He thu ziah lai thleng hian Mizoram police-te chu Assam police-te'n an nawr kìrna hmunah hian an la awm.

Nilaini zana Mizoram police-te puan-in kaihna hmun bul hnaiah Assam police-te chuan nimin khan riahbûk an siam zui nghal a, Mizoram police-te chu phei an phalsak tawh lo.

Innawr buaina a thlen lai hian Mizoram police chu 20 vel an ni a, Assam police lam chu 100 chuang an nih bakah, silai, tear gas leh hmanraw dangte an thawhchhuahpui thung. Buaina chhuah hnuah Mizoram police-te chu police dang 10 velin an fin ve leh a ni.

Assam police-te hi June 29, 2021 khan Aitlang rama Lalchhandama huana inkulh tumin an thawk chhuak a, Mizoram police leh Vairengte mipuiin Ramhluna huanah an lo dang. Assam police lam hian June 29 zanah Mizoram police leh khawtual mite awm mang loh laiin an nawr a, Lalchhandama huan an thleng.

June 30, Nilaini khan Mizoram police tam zawkin Aitlang ram an pan a, mi 100 chuangin Lalchhandama huanah an awmchilh nghal. Lalchhandama huanah hian state pahnih police-te an la awm.

Lalchhandama huana awm ringawt chu ṭha tâwk loa hriat a nih avangin Vairengte khawtlang hruaitute duh dan angin Ramhluna huan lam aṭanga kala Lalchhandama huan zâwnah Vairengte ṭhalai leh Mizoram police-te chuan June 30 zan khan riahbûk pathum an sual a, chu'ngte chu Assam police-te'n nimin khan tichhia a, Assam police-te hian he lai hmunah hian riahbuk an siam zui a ni.

Nilaini khan Aitlang ramah hian Kolasib DC Dr H Lalthlangliana leh Hailakandi DC-te an inbia a, buaina chhuak a awm lo. Ruahmanna an siam dan chuan, July 9, 2021-ah state pahnih chief secretary-te an inbia ang a, chumi hma chuan state pahnihte'n Aitlang ramah hmalakna neih loh tur a ni.