ASF vangin vawk 8,360 a thi tawh Zangnadawmna kan nawr dawn - AH&Vety Minister

African Swine Fever (ASF) avangin nimin thleng khan Mizoramah vawk 8,360 a thi a tawh. AH&Vety minister Dr K Beichhua chuan, hri vanga vawk chánte'n zangnadawmna an hmuh ngei theihna atan theihtawp chhuaha an nawr tur thu a sawi.

AH&Vety Minister hian nimin khan a pisaah thuthar thehdarhtute a kâwm a, "ASF vangin Mizoramah vawk 8,360 a thi tawh a, vawk dang 489 pawh ASF vanga thi ni ngeia rinhlelh a awm a, mahse, an sample test result a la chhuak lo. District 10 a tuam tawh a, Kolasib district chiah an bâng tawh. Ni tin vawk thi a awm reng a, department chuan vawk neitute nen ṭanghoin theihtawp a chhuah zel a ni," a ti.

Dr K Beichhua chuan, Mizoramah ASF a luh lohna turin kum 2019 aṭangin hma an lâk ṭan thu sawiin, "Ram dang aṭanga vawk lak luh khap a ni a, August 2019 aṭang phei chuan khap bur a ni. State leh district level-ahte committee dinin, awareness campaign-te kalpui a ni," a ti a, theih­tawp chhuah mah se, van­duaithlak takin April 16, 2021-ah Mizoramah ASF a rawn lut tih finfiah a nih thu a sawi.

March 21, 2021 aṭanga Lungsena vawk thi awm ṭan chu department-ah March 25-ah an hriat thu sawiin K Beichhua chuan, "Tlabung DVO a hmunah tirh nghal a ni a, April 5-ah investigation team tirh leh a ni. Mahse, Mizoram hmun hrang hrangah a darh hman. ASF avanga vawk chánte kan thinlung tak takin kan tawrhpui a ni," a ti.

Minister chuan, ASF vei vawk zinga 797 chu a neitute remtihnain department-in an suat tawh tih sawiin, "Vawk neitute'n zangnadawmna an dawn theihna atan central sorkarah thlenin kan nawr dawn," a ti.

AH&Vety Minister sawi danin, sorkar laipuiin rate a neih sa ang chuan zangnadawmna hi vawk notê kg. 15 vel chinah Rs. 2,200, kg. 15-40 inkarah Rs. 5,800, kg. 40-70 inkarah Rs. 8,400, vawkpui kg. 70-100 inkarah Rs. 12,000 leh kg. 100 vel chinah Rs. 15,000 hmuh theih a ni.

Vawk suat kher lote pawh zangnadawmna ngaihtuahsak an ni dawn tih sawiin Dr K Beichhua chuan, "State Disaster Management Authority-ah kan thlen a, anni'n National Disaster Management Authority-ah an thlen ve leh ang. Vawk thi hi ṭanpuina pek theih huangah tel lo mah se, theihtawp chhuahin kan nawr tláng dawn a ni," a ti.

Dr K Beichhua chuan, vawk vulh lamah hmalak nasat a nih thu sawiin, "ASF hi léng lo se chuan kum thum chhungin vawk saah kan intodelh theih kan beisei. Theihtawp chhuahin vawk tipung leh turin hma kan la dawn a, kan chànna hi chonaah i ngai ang u," a ti a; hri léngin kian hun a nei ṭhin tih hriaa hnual mai lo turin vawk vulhtute a chah.

Thuthar thehdarhtute zawhna chhangin Minister chuan, ASF lèn chhana mawhphurtu chhui chhuak turin FIR an thehlut a, mahse, chhuina report an la dawn loh thu a sawi. Minister hi AH&Vety secretary Lalzarmawii leh director Dr H Laltlanmawia ten an ṭawiawm a ni.