Kângṭhelh motor thar 3 lei a ni

Disaster Management and Rehabilitation (DMR) minister Lalchamliana chuan nimin khan Fire & Emergency Services department hnenah kângṭhelh motor, high pressure pump fire tender pathum a hlân.

Kângṭhelh motor tharte hi State Disaster Management Authority (SDMA) kaltlanga Rs. 1,39,50,000 sénga lei a ni a, Restricted tender hmangin Sova-High Tech Industries, Guwahati aṭanga lei niin, TATA 712 LPT chassis a ni.

Minister Lalchamliana chuan, kângṭhelh motor ṭha an neih thar rualin, kângṭhelh tur awm lo se a duh thu sawiin, "Kumin April 14 aṭanga chawlhkar khat chhung Fire Safety Week hman a nih hnuah Mizoram hmun 49 velah ram kâng avangin harsatna kan tâwk hman. Kângmei chhuak avanga chhiatna thleng tam zawk hi mihringte'n kan thlen chawp a ni," a ti a, fimkhur turin mi tin a chah.

Kumina Lungleia kângmei chhuak chu Indian Air Force pun ngai khawpa nasa a nih thu sawiin Minister chuan, "Khami ṭuma ram kâng ṭhelhnaa thawk chhuak zawng zawng chungah lawmthu ka sawi a ni," a ti a; Mizoram sorkarin ram kan chhan chhui tur team a din thu leh report dawn thuai beisei a nih thu a sawi.

Kangṭhelh motor tharte hi tui litre 3,500 zel phur thei a ni a; SDMA-in a rèl angin Mizoram luhká - Vairengte, Bairabi leh Kanhmun aṭanga châkkhai phur lirthei lian rawn lutte disinfectant hmanga phuhna atan leh ṭul danga hman theih tura ruahman a ni.