NHM hnuaia thawkte'n an thil phûtte July 10, 2021 hmaa chinfel an phût

National Health Mission Employees Union, Mizoram (NEUM) chuan thuchhuah siamin, ṭha­hnemngai taka hna an thawh laia an harsatna sorkara an thlen tawhte chinfel a la ni lo leh harsat­na an neih belh zawk chu chinfelsak vat turin Mizoram sorkar an ngen. An phût zingah, NHM hnuaia thawk Covid-19 vei, inenkawlna senso mahni intum tawhte July 10, 2021 hma ngeia pek lêt a tel.

NEUM tarlan danin, NHM hnuaiah doctor, nurse, health worker, laboratory technician, pharmacist, x-ray techni­cian, opthalmic assistant, driver, office staff leh thawktu dangte an tel a, an vaiin mi 2,175 an ni.

Covid-19 hripui léng avangin hmun hrang hrang­ah nasa zawkin mipui hriselna atan theihtawp chhuahin hna an thawk tih sawiin NEUM chuan, "Kan hna pangngai bakah Covid-19 kaihhnawih - damlo enkawl, sample lak leh endik, vaccine pek, leh thil dangahte theih­tawp chhuahin kan thawk ṭhin a, hengte hi kan mawhphurhnaah kan ngai," an ti.

NEUM hian harsatna an neihte zinga a pawimawh zual an tarlang a, chu'ngte chu a rang thei ang bera chingfel turin sorkar an ngen a; "July 10, 2021 thleng hmalakna kan ngaichâng dawn a, hemi chhunga kan ngennate tihhlawhtlin a nih loh chuan kum tam tak kan tawrh tawhna avangin hreh tak chungin nasa zawka hmalak a ni ang. Mipuite'n kan harsatna min hriatthiampui turin kan ngen lâwk e," an ti.

NEUM harsatna langsar zual leh an ngente
• Covid-19 donaah mahni inséngsoa chêt chhuahna tur nei kan awm ṭhin a, ṭhenkhat chu pûk chawp hialin an pên chhuak. Tunah thla hnih hlawh kan la lo leh ta a, kan thawh hlawh hi thla tin hunbi pangngaia min pe turin kan ngen.
• NHM hnuaia thawk, Covid-19 kai vanga inenkawlna senso anmahni an lo pektir tawhte hi July 10, 2021 hma ngeia pe kîr vek turin sorkar kan phût. Hun lo la awm turah NHM-a thawk, hripui kai vanga enkawl ngaite chu a thlàwna enkawlna pe vek turin sorkar kan ngen a, July 10, 2021 hmaa min tihfelsak kan beisei.
• Medical reimbursement (MR) kan bill theih ṭhin chhan mumal awm loa tihtawpsak kan ni a, NHM, Mizoram hnuaia thawk zawng zawngte'n Mizoram sorkara thawktute MR dan ang ang kan hman ve theihna turin July 10, 2021 hma ngeia min tihfelsak kan ngen.
• July 2020-ah HFW department hnuaiah regular post ruak a awmin NHM hnuaia thawkte hi MoHFW, Govt. of India duh dan anga a ngheta luh theih dan tur ruahmanna min siamsak rawh se tih kan thlen tawh. Sorkar hotute nena kan sawiho tawh, 'HFW department hnuaiah regular post ruak a awmin 70% (NHM seniority base) chu NHM, Mizoram hnuaia thawk mekte tan reserve tur a ni,' tih hi chak zawka min tihhlawhtlinsak ngei kan phût.
• Health department-a hna ruak hrang hrang 700 chuang hnawhkhah loh la awm hi a rang lama hnawhkhat turin kan sorkar chak tak kan phût a ni.
• Kum 15 thawk tawhte special scheme siamsak ni se, tia thu dah, kum 2019-a mi tun thlenga hmalakna awm lo hi a rang lama min ngaihtuahsak turin kan phût.
• Sorkar laipuiin kum 2011-a thuchhuah a neih tawh, state sorkarin plan fel tak siama kum 5 thawk tawh chin regularise tura a tih hi kan state tan a harsa mai thei, kum 10 thawk tawh chin tal hi chu state sorkarin min regularise/absorb ngei kan phût a ni.