Kawṭhalo danna pek dan tur sawifiah

Lunglei chief medical officer (CMO) Dr LC Liana chuan nimin khan a pisaah Lungleia thuthar thehdarhtute a kâwm a; kumin July 1-15 chhungin an district-a naupang kum 5 hnuai lam 14,437 hnenah kawṭhalo danna damdawi pek tum a nih thu a sawi.

CMO Dr LC Liana leh damdawi lam hotu­te sawi danin, July 1-15, 2021 chhungin Intensi­fied Diarrhoea Control Fortnight (IDCF) kalpui a ni dawn a; IDCF hman chhungin Lunglei district-a naupang kum 5 hnuai lam mi 14,437 hnenah kaw­ṭhalo danna pek tum a ni.

IDCF chhung hian health worker leh ASHA-te kaltlangin Lunglei district-a naupang kum 5 hnuai lam tan in tinah ORS leh Zinc sem a ni dawn a; kawṭhalote tan Health sub-centre-ah ORS leh Zinc lak theih a ni. Zinc hi ni 14 chhung ei tur a ni a, kawṭhalo chu Covid-19 symptom pakhat a nih theih avangin containment area-a kawṭhalo te chu swap sample endiktir tura chah an ni.

Senior medical officer Dr Lalrinthangi sawi danin, khawvelah naupang kum 5 hnuai lam thi zinga 10% chu kawṭhalo vanga thi an ni a; India ramah kum khatah naupang kum 5 hnuai lam 1,00,000 velin an thihpui ṭhin bawk.