Hriselna lama hmasawnna atan Theihtawp chhuah turin inchah

Nimin, July 1 kha Doctor's Day a ni a, he ni pual hian Indian Medical Association (IMA), Mizo­ram Branch chuan thuchah tichhuakin, an member-te chu mipuite'n hriselna kawnga hma an sawn theih nan theihtawp chhuah zel turin an chah.

IMA, Mizoram Branch chuan, Covid-19 hripuiin khawvel a nuai mek tih tarlangin, "Mizoram pawh nasa takin min bei mek a, mi tam takin an kai a, mi tam takin an nunna hlu tak an chàn phah tawh. Kan member mi 41 laiin hripui hi an kai ve tawh a, pahnih phei chuan nunna an chàn phah. Hripui léng hi ram economy-in a tuar a, mi tam tak retheihna khurah a hnûk lut mek a ni," an ti.

Hripui léng avang hian mipui tana an buatsaih ṭhin special clinic an tihlawhtling thei rih lo tih sawiin IMA chuan, "District tinah kan mem­ber-te hripui laka mipui an him theih nan theih­tawp chhuahin kan buai tlang hle. Aizawlah phei chuan community covid care center awm zawng zawng deuhthaw hi IMA team-in a vil mek a ni," an ti a; hripui veite enkawlna hmunpui Zoram Medical College-ah pawh an member-te'n rim leh hah takin hri vei na zualte an enkawl mek thu an tarlang.

IMA chuan, Covid-19 hmachhawn kawnga frontline worker - nurse, laboratory technician leh thawktu dang te, ambulance enkawltu te, bawlhhlawh paihtu te, tui semtute leh ṭul dang buaipuia hri léng kara feh chhuak ṭhinte an hriat reng thu an tarlang a, "He hri lakah hian in him zel theih nan duhsakna kan hlan che u a ni," an ti.

IMA, Mizoram Branch-ah hian medical doc­tor (practicing modern medicine) member 788 an awm mek a, sorkar hnathawk lai, châwl tawh, private practitioner leh internship ti laite an tel a ni.