Hripui vei hmuh thar 101 zingah Mizorama kái mi 40 an awm
November 3, Thawhlehnia Mizorama Covid-19 vei hmuh chhuah mi 101 zingah Mizoram chhunga kái chhâwng mi 40 an awm a, an zingah Covid care centre (CCC) enkawltu nurse pakhat a tel.
Sorkar thuchhuah aṭanga a lan danin, hripui vei November 3-a hmuh, tualchhunga káite chu Aizawla veng 11 leh khaw dang palia mite an ni a; mi pariatte chu an kai ṭanna hriat a ni lo a, Covid-19 symptom nei mi 17 an awm.
Mizorama kái zingah hian Thingsulthliah JNV CCC-a hripui veite enkawltu nurse hmeichhe pakhat a tel. Ani hi Covid-19 donaa thawk tura sorkarin a lak zinga mi a ni a, a duty loh lai niin, Aizawla CCC pakhata duty tura dah tum mek a nih thu dawn a ni. Staines Memorial School, Aizawl hostel-a awm zirlai pali an tel bawk.