Covid-19 léng thawh hnihna chhungin Hripui vei mi 16,016 hmuh a ni tawh

Kumin June thla tàwp thlengin Mizoramah Covid-19 vei mi 20,492 hmuh chhuah a ni tawh a, first wave chhungin mi 4,476 leh second wave chhungin mi 16,016 hmuh chhuah a ni.

Mizoram sorkar tarlante aṭanga a lan danin, Mizorama hripui vei hmuh chhuah tawhte chu mipa 11,752 leh hmeichhia 8,740 an ni a, an zingah kái nawnte pawh an awm.

Hripui léng thawh khatna thla 13 (March 2020 - March 2021) chhungin mi 4,476 hmuh chhuah a ni a, hmuh zawng zawng aṭangin 21.84% a ni. A thawh hnihna, April 2021 leh a hnu lamah mi 16,016 hmuh chhuah niin, hmuh chhuah tawh zawng zawng aṭangin 78.16% a tling.

June 2021 bikah Covid-19 positive 8,093 hmuh chhuah a ni a, chu chu hmuh tawh zawng zawng 20,492 aṭangin 39.49% a tling a; kumin June thlaah vek hian hripui vangin mi 53 an thi a, June 30 thlenga hripui vei thi tawh zat 93 aṭangin 56.99% a ni.

Covid-19 positive hmuh chhuah tam ber ní chu June 20, 2021 niin, mi 673 hmuh chhuah a ni a, hei hi TNT, Muanna Venga sample endik rûnpui neih ní a ni. Hripui vanga thi tam ber ní chu kumin June ni 4 leh ni 14 a ni a, mi panga ve ve an thi. Kumin June thlaa ni 30 awmah hripui vanga thi awm loh ní ni thum chiah a awm.

Hetih lai hian, hripui vei hmuh tawh 20,492 zinga mi 16,442 chu dam taka chhuahtir an ni tawh. Chhuahtir an tam ber ní chu June 30, 2021 niin, mi 676 chhuahtir an ni a, an zinga mi 500 chuang chu TNT-a mite an ni.