Mizoramin a la luah ngai loh luahin Kan cheibâwl mek - Serlui MLA

Serlui bialtu MLA Lalrinsanga Ralte chuan a bial chhung, Vairengte ramah Assam mite an luh avangin Vairengte a pan a, Mizoramin a la luah ngai lohna hmun luahin a cheibáwl mek thu a sawi tih MNF thuchhuahin a tarlang.

MNF press release tarlan danin, Lalrinsanga Ralte chuan, "Chief minister Pu Zoramthanga kaihhruai MNF sorkar chu ṭhenawm state-te nen ramri buaina a awm a nih pawhin tláwm zawk leh hnung tawlh zawkah ṭan kan tum lo," a ti.

Kum 2019 leh 2020-ah Vairengte dáiah Assam lamin Mizoram an tibuai nia sawiin MLA chuan, "Hei hi Vairengte mipuiin huaisen taka lo chháng lêtin an lo bei a, sorkarin a tih tur tak ti nghalin kan sipaite'n silai cheng kau sain Assam sipai an hmachhawn nghal. Km. 1 vel Assam lamah kan nawr lêt a, Mizoin engtik lai maha kan la luah ngai lohna hmun chu tunah hian luahin kan cheibáwl mek a ni," a ti a; Vairengte V/C-te'n ram ṭhehin, chhungkaw 70-te in hmun pek nghal a nih thu a sawi.

Lalrinsanga Ralte chuan, "Tuna Assam lamin ramri chungchanga min rawn tihbuainaah pawh Mizoram Sorkar chu hnungtawlh a tum lo a, sipai ṭhahnem tak Vairengte khawtlangin an duhna hmun takah duty post siamtira awmtir nghal a ni. Kan sipaite hi silai cheng kau sa reng an ni a, eng pawh hmachhawn turin kan inpeih reng a ni," a ti.

Serlui Bialtu MLA hian Vairengte community covid care centre bul ṭanna turin Rs. 1,00,000, damdawi, hmanrua leh bungraw eng emaw zat a pe nghal a ni.