KHAWTHLIR

Covid-19 vaccine
Health department chuan Covid-19 vaccine la la lote'n first dose an lâk dan tur a tichhuak. Aizawlah chuan Dawrpui Multipurpose Hall leh Bawngkawn South YMA Hall-ah Pathianni tih lo ni dang zawngah lak theih a ni a, district dangah chuan CMO /district immunization officer-te zawh chian theih a ni.

CM Relief Fund
CM Relief Fund for Covid-19 ah nimin khan MNF, Mission Veng South Unit-in Rs. 10,000 an chhung lut a, chumi nen chuan nimin thlenga CMRF-a sum lut tawh chu Rs. 26,98,68,678 a ni. Covid-19 kaihhnawih ṭanpuina atan leh damdawi bungrua hrang hrang lei nan Rs. 25,24,94,470 hman a ni tawh a, hman loh Rs. 1,73,74,208 a la awm a ni.

Containment zone
Ṭhuampui leh Republic Vengthlang hmun ṭhenkhat chu Aizawl DC-in June 30, Nilaini zan khan containment zone-ah a puang. Electric Veng leh Bethlehem Vengthlang hmun ṭhenkhat, containment zone-a puan tawh chu hlih a ni a, hmun ṭhenkhat dang chu containment zone a la ni chhunzawm bawk.

Raltlan tanpui
Champhai Venglai Presbyterian Kohhrante chuan nimin khan Myanmar buaina avanga Mizorama rawn raltlante ṭanpuina atan Tuipuiral Group YMA hnenah Rs. 1,00,000 an pe.

Ei tur sem

MNF ṭhalaite chuan Nilaini zan khan Remna Ni pualin Aizawla hmun pangaah police duty-te sawhchiar leh thingpui an sem. MNYF president Lalrinawma chuan, "Hri léng avangin duh angin Remna Ni hman theih a ni lo a, he ni pual hian kan police-te kan ngaihhlutzia lantir nan kan che chhuak a ni," a ti.

SRH-ah mi 12-in Ventilator hmang
State Referral Hospital-ah Covid-19 vei mi 187 enkawl mek an ni a, an zinga mi 31 chu ICU-ah awmin, mi 12 chu ventilator hmantir mek an ni. SRH-ZMC Bulletin-in nimin tlai dar 5 dinhmun a tarlan danin, SRH-ZMC-ah hian ward-ah mi 156 awm mekin, an zinga mi 46 chu oxygen pek mek an ni.