Zirnaah harhna chan theih nan Theihtawpin hma kan la - Chhantea

School Education minister Lalchhandama Ralte chuan nimin khan a bial chhunga khua ṭhenkhat - Vaitin, Thingsât, Khawpuar, Khawdungsei, Hmunsang leh Zohmunte a tlawh a; vantlang hmaah thu sawiin, Mizoramah zirna lama harhtharna a thlen theih nan sorkarin theihtawpin hma a lak thu a sawi.

Lalchhandama Ralte chuan, “Zirnaah harhtharna a thlen theih nan theihtawpin hma kan la a. Mipuite’n zirnaa an chanvo an chan theih nan zirtirtu nei ṭha lo khuaah zirtirtu kan dah tawh,” a ti a; thingtlang mite’n hna ṭha leh sang an thawh theih nan zirna ṭha a pawimawh tih sawiin, “Sorkarin a ngaih pawimawh zirna siamṭhat nan hian zirtirtu leh sikul in (building) neih ṭhat phawt a pawimawh hmasa a ni,” a ti.

Minister chuan, hmar tlangdung chu Sinlung Hills Council-in a ṭhutchilh tawh avangin sorkar a inchhawp hnai tawh tih sawiin, SHC hmangin kawng hrang hrangin hmasawnna hna thawh zel a nih dawn thu a sawi bawk.