Covid-19 vangin inràwnkhawm a ni, theihtawp kan chhuah - Chief Minister

Nimin khan chief minister Zoramthanga hoin Assembly Annexe conference hall-ah minister, páwl hrang hrang leh political party aiawhte'n Covid-19 do chungchang an sawiho a; pawl hrang hrangin thu thlen an neihte chu sorkarin a ṭul angin a bawhzui dawn. Chief Minister chuan, an hmalaknaah theihtawp an chhuah chungin an famkim tâwk lo tih an inhriat thu a sawi.

CM Zoramthanga chuan, Covid-19 donaah theihtawp an chhuah chungin an theihna a chaurau a, an famkim tâwk lo tih an inhriat thu sawiin, "Khawvela mithiamte'n an thiamna an thawh khawm a, tun dinhmun kan thleng a ni. Mizoramah pawh sorkar, frontline worker, tlawmngai pawl, kohhran, political party leh mipuiten theihtawp an chhuah a ni," a ti.

Hmalaknaah mi zawng zawng duhthusam an tlin loh tur thu sawiin Zoramthanga chuan, "Pathian pawhin tih theih tâwk tih erawh a phût a ni," a ti a, theihtawp an chhuah zel thu a sawi.

Health minister Dr R Lalthangliana chuan rorel thiam a har thu sawiin, "Kan hmalaknaah fuh tâwk lo a awm thei. Kan thurel a hnu lawka lo fuh tawk lote a awm leh ṭhin a, tih dik loh leh tih fuh tâwk loah ngaihdam kan dil. Khawvel ram ropui ber berte pawh an che fuh vek thei lo. Sem sem dam dam, ei bil thi thi tiin Covid-19 avangin mimal leh pawl an luang chhuak nasa a, a lawmawm hle a ni," a ti.

Health Minister sawi danin, Mizorama Covid-19 vei hmasa ber chu March 2020 tàwp lamah hmuh chhuah a ni a, December 2020-ah mi 369 hmuh chhuah niin, a tlahniam zel a, March 2021-ah chuan mi 53 chiah hmuh chhuah a ni. April 2021 aṭangin hripui vei an pung a, nimin zing thlengin hripui vei 4,131 an awm mek a, Aizawl district bikah mi 3,136 an awm a ni.

Pathianin ṭawngṭaina a chhàn avang leh thawhhona a ṭhat avangin Mizoramah chuan state dang ngaihtuahin Covid-19 vanga thi an tlem thu sawiin Dr R Lalthangliana chuan, "Nunna chán zat hi WHO pawhin tehfung pawimawh takah a hmang. Keini anga contact tracing ti uluk an awm tawh lo. Chhuak turte test leh thlap ṭhin kan nih avangtein hripui vei chhuak zat hi hmun dang aiin a lang tlem a ni," a ti.

Inràwnkhawmnaah hian Chief Minister leh Health Minister bakah, Assembly Speaker, minister te, Covid-19 Medical Operational Team Chairman leh Aizawl Mayor te, political party, tlawmngai pawl, Mizoram Kohhran Hruaitu Committee, Indian Medical Association, Non Governmental Association of Mizoram, All Mizoram Village Council Association leh Aizawl City Local Council Association aiawh te, Chief Secretary leh sorkar official-te an tel a ni.