Covid SOP siamṭha turin Court-in sorkar a hriattir
Mizoram sorkarin Covid-19 vanga inkaihhruaina (SOP) a siam thar ber, tuna hman mekah India Danpui kalh a awmah Gauhati High Court, Aizawl Bench chuan a ngai a, siamṭha turin Mizoram sorkar a hriattir.
Mizoram sorkarin Covid-19 SOP a siam thar chu Gauhati High Court chuan July 1, Ningani khan a ngaihtuah a, thutlukna tichhuakin, thil hrang hranga Covid-19 vaccine la tawhte chauh tih theih leh phalsak chu Fundamental Rights kalhah ngaih a ni.
High Court chuan SOP chu hman rih loh tura dah (stay) a tum a; mahse, Mizoram sorkar ukilin SOP siamṭha tura sorkar sawipui a intiam avangin Court chuan a stay rih lo.
SOP chungchang hi Gauhati High Court chuan nimin khan a ngaihtuah leh a, SOP siamṭha turin Mizoram sorkar a hriattir a ni. SOP-in vaccine la tawhte pawh Covid-19 laka invenna tura zawm turte ti tura a phût tho avangin vaccine la lote khuahkhirh bik chu behchhan nei lo thilah a ngai a ni.