Lungleia MLA-te leh MJA-te an inkâwm

Agriculture minister C Lalrinsanga, Lunglei HPC vice chairman Lawmawma Tochhawng leh Bamboo Development Board vice chairman Dr K Pachhunga te chuan nimin khan Lunglei Circuit House-ah Lunglei district MJA member-te an kâwm a, sorkar hmalaknate an hrilhfiah.

C Lalrinsanga chuan, a department chan pathum hnuaia hmalakna kal mekte sawiin, "Mizoramah agriculture lama harh tharna a thleng mek. Sorkar laipui, NABARD, IFAD, United Nations hnuaia Food and Agriculture Organization (FAO), adt. kaltlangin Mizoram hmun hrang hrangah agriculture kaihhnawih hmalakna lian tham tak tak kalpui mek a ni," a ti.

Kut hnathawktute'n thlai chi ṭha an duh tâwk an hmuh theih nan thlai chi tihpunna leh dahṭhatna tur kalpui zel tum a nih thu sawiin C Lalrinsanga chuan, "Seed bank leh seed village-te pawh kalpui zel tum a ni a, sorkar kutah chauh ni loin, mahni kutkawiha eizawnna kawng dap thiamte nena ṭangkawpa hmalak zel tum a ni," a ti a; farmer producer organisation 10,000 din tura hmalak mek a nih thu leh Sihphir Neihbawiha Bio Fertilizer Unit kalpui mek chu Mizoram hmun dangah pawh kalpui tum a nih thu a sawi.

Irrigation & Water Resource deptt hnuaia Southern Data Centre tur Lunglei Chanmari-a sak mek chu National Hydrology Project hnuaia kalpui a ni a, chu chu lui leh tuihna dinhmun zir chianna kawnga hmanraw pawimawh tak a nih dawn thu te, Cooperation department hnuaiah tribal-te'n an chhehvela ramngaw hausakna awmze nei zawka an hman ṭangkai theihna tur sorkar laipui hmalakna Van Dhan Mission kalpui mek a nih thute Minister chuan a sawi bawk.