Aitlangah boruak thar a awm rih lo Lailapur lamah Assam an inchhawp

July 1, 2021, Ningania Mizoram leh Assam police-te an innawr buai hnuah Vairengte khaw ram Aitlangah boruak ṭha lo thar a awm rih lo. Assam police-te chu Lailapur lamah an inchhawp hnai nia thu dawn a ni.

Tarlan tawh angin, Ningani khan Assam police-te chuan Vairengte leh Mizoram police-te puan-in kaih an tichhia a, awm a phalsakna thleng an nawr lêt a ni. Mizoram police-in puan-in an kaihna hmun leh a chhehvelah Assam police-te an inkulh nghal a, a hmun panna pawh nimin khan an ping.

Ningania an innawr lai hian Assam police chu 100 chuang an ni a, Mizoram police chu 20 vel chiah an ni thung. Mizoram police pawh nimin khan an indah belh a, Assam police-te'n an nawr pheina hmunah an la awm mek.

Assam lam hian Ningani tlaiah Lailapur lamah police an chhawp hnaih avang leh Bilaipur (Vairengte tlak lam Aitlang mawng) lam aṭanga rawn nawr an tum anga report a awm avangin ramri khàn hrang hrangah Mizoram police-te chu nimin khan an insem darh a ni.

Ramri bulah Assam lam an inchhawp zel avangin Vairengte ṭhalaite chu Ningani zan khan Vairengte community hall-ah an inhmukhawm a, a ṭul anga Mizoram police puih an rêl.

July 1, Ningani vêk khan Mamit district-a Mizoram leh Assam inrinaah Karimganj DC leh SP hoin police ṭhahnem takin ramri lei, Medili lei bula Mizoram IR duty an rawn hmu a, ramri chin leh quarters chungchangte an zawhfiah hnuah buaina siam loin an kîr a ni.