KHAWTHLIR
Thisen pe
Salvation Army Youth (SAY) Western Division, Kolasib chuan nimin khan Kolasib District Hospital-ah thisen pek huaihawtin, thisen unit kua an pe a, petute mipa panga leh hmeichhia pali an ni. Civil Hospital, Aizawl blood bank-ah mimala a thlawna thisen pe pasarih an awm bawk.
Agri. hnathawhte Enpui turin chah
Agriculture minister C Lalrinsanga chuan Ningani khan Lungleia Agriculture department hmunhma tura hmalaknate a enfiah a, ruahmannate ṭha taka tih puitlin a nih theih nan department hotute chu hnathawhte uluk taka enpui turin a chah. Minister hian a biala Rahsi Veng a tlawh nghal a, Rs. 10,000 leh Covid-19 dona hmanraw chi hrang hrang VTF hnenah a pe a ni.
Ambulance hlân
Mizoram Rural Bank chuan CSR kaltlangin Lairam Isua Krista Kohhran (LIKBK) damdawi-in, Lairam Christian Medical Centre hnenah ambulance an pe a, nimin khan MRB chairman V Jayachandra-a'n Aizawla LIKBK pastor Rev. S Lalpuiliana hnenah a hlân.
PC party-in tanpui
Peoples' Conference party chuan nimin khan Aizawla home/centre pathum - Gan Sabha, International Poor Children (Specialist Adoption Agency) leh Operation Kingdom Ministry-te hnenah ṭanpuina chi hrang hrang an pe. Ṭanpuina hi party hruaitute'n a hmunah an hlân a ni.
Lawmpuina hlân
Champhai South bialtu MLA TJ Lalnuntluanga, minister of state chuan nimin khan a bial chhunga kumin HSLC & HSSLC-a pass-te hnenah khawtlang hruaitute kaltlangin lawmpuina a hlân. A biala VTF-te hnenah Covid-19 laka invenna hmanraw chi hrang hrang a pe bawk.
Containment zone
Tuithiang, Bawngkawn leh Sairang Dinthara hmun ṭhenkhat, containment zone-a puan tawhte chu Aizawl DC-in July 1, Ningani zan khan a hlîp a, veng pathumah hian hmun ṭhenkhat, containment zone la ni zui zel a awm bawk. Kanan Veng leh Phunchawnga hmun ṭhenkhat, micro-containment zone hlih a ni a, Phunchawngah hian hmun ṭhenkhat micro-contaiment zone-a puan chhunzawm a la awm bawk a ni.