Mizoram police-te pèn khat pawh An la tawlh lêt lo - Kolasib DC

Kolasib DC Dr H Lalthlangliana chuan nimin khan Covid-19 inkaihhruaina thar leh ramria hmalakna chungchangah Kolasib-a thuthar thehdarhtute a kâwm a; ramri chungchangah, Hailakandi DC nen an inbiakna angin sipai duty dah a nih thu leh Mizoram police-te chu pèn khat pawha an la tawlh lêt loh thu a sawi.

Kolasib Bawrhsap chuan, tun hnaia ramri chungchanga Vairengtea hmalak dan sawiin, "Hailakandi DC nen kan inbe reng a, kan inbiakna angin sipai duty pawh dah a ni. DC-te inbiakna aṭanga duty-na tur hmun ruahman aṭangin Mizoram police-te hi pèn khat pawh an la tawlh lêt lo," a ti.

Thuthar thehdarhtute zawhna chhangin H Lalthlangliana chuan, Mizoram police duty-na hmun pahnih chu Assam police-te'n an ṭhiah thu a sawi a, "Amaherawhchu, heng duty post pahnihte hi district pahnih DC-te'n duty-na tura an ruahmanna hmun a ni lo. Duty-na tura kan tihna hmunah chuan ṭanhmun nghet taka khuarin an la duty reng a ni," a ti a; duty post ṭhiah a nih chungchangah Hailakandi DC a biak nghal thu leh, an che leh a nih chuan khauh taka chhan lêt a nih tur thu a sawi.

Dr H Lalthlangliana chuan, sorkar hmalakna tiṭhuanawp thei zawngin khawtlang leh tlawmngai pawl zingah ramri chungchanga kal fawr bik awm lo se a duh thu a sawi a; sorkar thu ngaichâng thiam tur leh Mizoram police duty-te dinhmun tiderthâwng thei thil social media-a thehdarh lo turin mipui a ngen.

Kolasib DC chuan, an district chhunga hripui kâi dan dinhmun zir a nih hnuah infiamna hmunte la hawn rih loh tura tih a nih thu a sawi a, "Vairengteah CCCC din tura hmalakna a kal mek a, VTF hriatpuina leh remtihnain Covid-19 vei, natna lang chhuak lote chu ina khung hran (home isolation) tum a ni," a ti.

Kolasib district-ah home quarantine lai an tam thu leh mahni inringhlela inendiktir aṭanga hri vei hmuh chhuah an tam thu sawiin Bawrhsap chuan, "Khawtlangah hri a léng tih hriat a nih avangin a darh zel tur veng turin VTF-te an pawimawh hle. Mipui himna atan Covid-19 vacine chu Kolasib district-ah chak taka kalpui mek a ni," a ti a; chak lehzuala vaccine pek kalpui a nih theih nan vaccine lak kawnga ti ṭha zual khaw pathum tan lawmman buatsaih a nih thu a sawi bawk.