Kawlbem nupa kutthlaktute hrem an phût

Kawlbem Student’s Union chuan nimin khan thuchhuah siamin, an khaw mi Daikhanlama leh a nupui chu Ngopa Ruihhlo Do Pawl intite'n July 1, Ningani khan manin nasa takin kut an thlak a, Daikhanlama chu a thih phah niin an tarlang a; kutthlaktute mana hrem ngei an phût.

Kawlbem SU chuan, Daikhanlama te nupa chu ruihhlo kaihhnawihah Ngopa Ruihhlo Do Pawl mite'n July 1, 2021 khan Kàwlbêm péngah an man tih sawiin, "Ngopaah hruaiin, nimin zing dar 1 vel khan Daikhanlama chu a thi tih Ngopa khawtlang hruaitute'n Kawlbemah kalin an hrilh a, a nupui pawh an sawisak nasat avangin a kaih bawk," an ti.

Daikhanlama ruang chu nimin zing khan Phuldungsei, Kawlbem pénga CZS camp-ah an dah a, chu chu Kawlbem khawtlang hruaitute'n an la tih sawiin Kawlbem SU chuan, "An kuta an lak hnuah nunna hial a lo chán ta leh a nupui a kaih phah hial hi kan dem tak zet a ni tih Mizo mipuite'n min hriatpui turin kan duh," an ti a; tun hma pawhin an khaw mite'n Ngopa mite kut an lo tuar tawh ṭhin tih an tarlang.

Kawlbem SU chuan, an khaw mi nupa chunga thil thleng chu an dem thu sawiin, "Mihring nunna hlut zo loa hetianga che duhte hi dan anga an chunga na taka action lak a nih theih nan thuneitute kan ngen a ni," an ti.