Aizawlah mi 300-te'n PPE an ṭhui mek

Aizawla puan ṭhui thiam zinga mi 300-te chu Mizoram sorkarin Covid-19 laka invènna thuam, personal protective equipment (PPE) a ṭhuitir mek a, PPE-te chu Health department hnenah pek thuai beisei a ni.

Commerce & Industries (CI) department hotute hnen aṭanga Vanglaini thu dawn danin, Aizawla puanṭhui thiam, inkharkhip avanga khawsak harsate puih nan sorkarin PPE full set a ṭhuitir a, a thawh khatnaah veng hrang hranga local task force-te thlan chhuah mi 300-in an ṭhui mek.

CI department hotute chuan, PPE ṭhuina senso chu Disaster Management & Rehabilitation Fund aṭanga hmuh tur a nih thu sawiin, "Puan ṭhuitu pakhatin PPE pakhatah Rs. 150 zel an hlawh dawn. A thawh khatnaah hian PPE 15,000 kan ṭhuitir a, mi pakhatin 50 zel an ṭhui. An chanpual ṭheuh an ṭhui zawh chuan Rs. 7,500 zel an hlawh ang," an ti a; a thawh khatna a zawh hunah puan ṭhui thiam dangin an ṭhui ve leh tur thu an sawi.

PPE-te chu SRH-ZMC-a Covid-19 veite enkawltu doctor-te duh dana duan a nih thu an sawi a, "Ṭhui zawh a awm hunah kan la khawm ang a, Health department hnenah kan hlan dawn a, tunah chuan hlan tur kan la nei rih lo," an ti.

Duh anga chaka ṭhui zung zung theih a ni lo tih sawiin CI department hotute chuan, "Puan ṭhuitute koh khawma training pek a rem lo a, a ṭhui dan tur kaihhruaina, PPE puan zai sa, kháwl là leh hmanraw ṭulte LTF kaltlangin kan thawn. Ṭhui dan tur enchawp a ngaih dawn avangin a hmasa lam chu a rei deuh kan ring a, mahse, puan ṭhui thiam sa an nih avangin a hnu lam chu an ti zung zung thei ang," an ti a; PPE an ṭhui tirte chu chawlhkar hnih vel hun pek an nih thu an sawi.

Tarlan tawh angin, SDMA hnuaia State Executive Committee chuan Covid-19 avanga harsatna thleng mekah, puanṭhuia eizawng, hna thawh tur nei lote'n thawh tur an neih theih nan tualchhunga ṭhui PPE hman ṭha a ti a, chumi bawhzui tur chuan CI department ruat an ni.

CI department chuan LTF-te hnenah an huam chhunga inkhàrkhip avanga an eizawnna chhunzawm thei lo puan ṭhui thiam zawng chhuak tura ngenna an thawn a, puanṭhui thiam mi 600 vel an dawng tawh. PPE 36,000 vel ṭhui tura ruahman a ni a, a thawh khatnaah 15,000 ṭhui tura hmalak a ni.