Inkaihhruaina ṭhenkhat tidanglam

State Disaster Management Authority hnuaia State Executive Committee chairman Lalnunmawia Chuaungo, chief secretary chuan June 1, Ningani zan khan July 15, 2021 thlenga hman tur Covid-19 inkaihhruaina tihchhuah tawh chu tlem azawng tihdanglam a nih thu a tarlang.

Inkaihhruaina hman laia 4(1) chu 'Chhiat tawh, dam loh leh ṭul bik thila AMC area aṭanga zin veivah ṭul tan an awmna LTF/VTF hriatpuina lehkha kengin an zin veivâk thei ang. Hetiang hriatpuina lehkha neite zin nan hian mimal lirthei leh Mizoram chhung khaw kar kawnga passenger phur lirtheite hman phal a ni. AMC area páwnah chuan zin veivah chungchangah inkhuahkhirhna hranpa a awm lo ang,' tia thlak a ni.

Aizawl khawpui leh khaw danga inkaihhruaina siam belh a ni a; Aizawlah kohhran/sakhaw hrang hrang leh NGO pisate hna ṭul zual thawk tura kal theih a ni a, khaw dang zawngah chuan hawn phal a ni thung.

Lirthei siamna - workshop, tyre work, motor silna leh servicing centre-te Mizoram pumah hawn phal a ni a; Aizawlah zan dar 7:30 leh zing dar 4 inkarah distributor/agent leh thlai semtute'n retailer/zuar chhawngtute hnena an sem phal a ni a, khaw dang zawngah chuan DC ruahmanna angin kalpui tur a ni.