Ramri-ah boruak ṭha lo a awm rih lo Assam CM-in lehkha a rawn thawn
Mizoram leh Assam ramri, Vairengte ram chhung Aitlang ramah state pahnih police-te June 30, 2021-a an innawr buai hnuah boruak ṭha lo a awm zui rih lo. Hetih lai hian, Assam chief minister Himanta Biswa Sarma chuan chief minister Zoramthanga hnenah lehkha a thawn.
Himanta Biswa chuan thuthar thehdarhtute a kawmnaah, chief minister Zoramthanga hnenah lehkha a thawn thu a sawi a, "Satellite thlalak aṭanga lang state pahnihin khawih loh tura tih (status quo) kan khawih lo a nih chuan buaina a awm loh tur thu ka hrilh. Kan state chuan kan ramri kan humhim a, kan ep state lam pawh kan be zel a ni," a ti.
Nagaland, Arunachal Pradesh, Meghalaya leh Mizoram te nen ramri buai an neih thu sawiin Assam CM chuan, "Remote sensing technology hmangin ramri hi chinfel theih a nih kan beisei," a ti a; ramri buai chingfel turin hma an lak ṭan thu a sawi.
Assam Chief Minister sawi danin, Mizoram leh Assam ramri buai chungchangah July 9, 2021 hian New Delhi-ah Mizoram leh Assam chief secretary-te an inbe dawn a ni.
Hetih lai hian, Aitlang ramah hian Assam police-te chu Mizoram police-te inkulhna hmun an tihchhiatsakna hmun leh a chhehvelah an inkulh zui zel a, an ram chin nia an chhàl chinah inkalpawhna an ping.
July 3, Inrinni khan Mizoram police-te chuan tui an lâkna ṭhin hmun chu kawng a rualrem loh avangin an siam rem a; mahse, a hmun chu Assam ram chinah ngaiin Assam police-te'n an remti lo a, Hailakandi SP remtihnain kawng chu an ping nghal a ni.
Tarlan tawh angin, Assam lam hian July 1, 2021 tlaiah Lailapur lamah police an chhawp hnaih avang leh Bilaipur (Vairengte tlak lam Aitlang mawng) lam aṭanga nawr an tum anga report a awm avangin ramri khàn hrang hrangah Mizoram police-te an insem darh a ni.