YMA-in mi hmingṭhate an chawimawi

YMA Sub-headquarters, Cham­phai chuan July 3, Inrinni khan zirlai ti ṭhate leh mi tlawmngaite chawimawina hun an buatsaih a, minister of state TJ Lalnuntluanga'n a hmanpui.

Chawimawinaah hian HSSLC Examination 2021-a top 10-a lang Champhai district mi pathum, doctor of medicine (Nephrology) hmu thar Dr Malsawmkima, Khuangleng leh, Covid-19 vei pitar enkawltu CT Ramnunmawii, Ruantlangte hnenah chawimawina hlan a ni.

Minister TJ Lalnuntluanga chuan, zirnaa mi hmingṭha leh mi dangte tana nunna thàpa inpete chawi­mawina buatsaih chu mi dangte zirtirtu ni se a duh thu a sawi a, "YMA chu ṭanpui ngaite ṭanpuitu, chhiat ṭhata mi lian leh tê thliar loa thlamuana awmpuitu, mi chi tinte en hrang lo leh chawimawi phúte chawimawia tiphûrtu a ni," a ti.

Mizoramin a mamawh ber chu ngaihtuahna dik neih a nih thu sawiin TJ Lalnuntluanga chuan, "Mimal leh páwlin an hlâwkpui tur vantlang tana hmasawnna ruhrel lian tham ni lo siam ai chuan, mipui vantlang leh khaw pumin kan chhawr ṭangkai theih tur leh inṭâwm theih hlâwm lian zawk siam turin ngaihtuahna sèn a ṭul. Ngaihsan zawng thlâk ngam leh hnathawh leh thil tih ṭhat leh ṭhat lohah inel a finthlak zawk," a ti a; YMA chu mipui sûkthlêk leh ngaihtuahnate siam ṭha tura theihtawp chhuah ṭhin turin a ngen.

Minister chuan, a enkawl Tran­sport department-in Champhai Sub-Hqrs YMA nen thawh dunna thu­thlung siamin, recovery van leh ambu­lance-te hman hawhtir tuma ruahmanna siam a nih thu leh oxygen concentrator pawh remchang hmasa berah ngaihtuahsak a tum thu a sawi bawk.

TJ Lalnuntluanga hian a bial, Champhai South huam chhunga khua leh veng hrang hrangte a tlawh nghal a ni.