KHAWTHLIR

PYD conference
Lunglei District PYD chuan nimin khan online hmangin conference vawi 53-na rorel inkhawm an nei a, district PYD conference kum tina neih ṭhin chu kum khat dana neih tawh turin an rél. District PYD Conference hi president C Lalremchhunga'n a kaihruai a; an rorel zingah - tuihna humhalh tura hmalak te, thisen pek rûnpui huaihawt te, TNT-a ṭanpuina pekte a tel. PYD, Lunglei district-ah hian bial 20-a tualchhung kohhran 94-ah member 5,245 an awm a ni.

CMRF for Covid-19
Nimin thleng khan CM Relief Fund for Covid-19 ah Rs. 26,99,69,678 a lut tawh a, Rs. 25,24,94,470 hman tawh a ni a, hman loh Rs. 1,74,75,208 a la awm.

Containment zone
Ramhlun North leh Saron Veng (Khuangchera section) hmun ṭhenkhat Covid-19 containment zone-a puan tawhte chu nimin khan hlih a ni. Heng veng pahnihahte hian containment zone ni zui zel a la awm bawk.

Covid-19 vei mi 1 thih belh
Covid-19 vei State Referral Hospital (ZMC)-a enkawl lai C Zoparliana (68) h/o Lalhmingsangi, Vairengte Venghlun chu July 3, Inrinni chawhnu dar 1:50 khan a thi a; sorkar record angin hripui vanga Mizorama thi 95-na a ni. Vairengte aṭanga thu dawn danin, C Zoparliana hi Covid-19 positive a ni tih June 21, 2021-ah hmuh chhuah a ni a, Kolasib-a enkawl a nih hnuah June 28 khan ZMC-ah enkawl ṭan a ni. Hripui a vei hmain natna dang a neih hriat a ni lo a, nimin chawhma dar 11 khan Vairengte community hall-ah vui a ni.

Hripui vei SRH-a enkawl zat tlahniam
State Referral Hospital (ZMC)-ah Covid-19 vei enkawl zat a tlahniam hret hret a, nimin tlai dar 5 dinhmun angin mi 188 enkawl mek an ni. SRH-ZMC Bulletin tarlan danin, SRH-ah hian nimin khan hripui vei mi 20 dah luh an nih laiin, mi 13 chhuahtir an ni a; enkawl mek mi 188 zinga 35 chu ICU-ah awmin, an zinga 16 chu ventilator hmanga enkawl mek an ni. Ward-ah mi 153 an awm a, chu'ng zinga 57 chu oxygen pek mek an ni.