Golgotha Centre-a awmte vaccine pe

Golgotha Camping Centre, Vairengtea awm mi 43-te hnenah July 3, Inrinni khan Covid-19 laka invenna damdawi (vaccine) pek a ni.

Covid-19 vaccine hi Vairengte Community Health Centre-a thawkte'n an pe a, Covid-19 vei mi 56 enkawl mekte chu an negative aṭanga thla thum hnuah pek a ni ang.

Golgotha Camping Centre hi Thuchah Hnuhnung Puangtu Team-in kum 2010-ah an din a, kum 2018 aṭangin ruihhlo ngaite enkawlna atan hman ṭan niin, ruihhlo ngai mi 93 an enkawl mek.

May 29, 2021 khan Centre-ah hian Rapid Antigen Test leh TrueNat Test hmangin swab sample endik a ni a, Covid-19 vei mi 56 hmuh chhuah niin, a hmun leh a chhehvel chu containment zone-ah puan nghal a ni.

Centre-a awmte hian Covid-19 vaccine lak dan tur kalphung pangngai anga la turin document pawimawhte an nei lo a, sorkar leh damdawi lama hotute'n Covid-19 vaccine an lâk theih nan ruahmanna an siam a, vaccination certificate an siamsak thei dawn a ni.