Football ngainatute'n ṭanpuina an pe

English club Manchester United leh Liverpool ṭantu Mizorama awmte chuan July 3, Inrinni khan hmun hrang hrangah ṭanpuina an pe.

Leitlangpui Manchester United Fans Club chuan Inrinni khan Thutak Nunpuitu Team (TNT), Lunglei hnenah Rs. 10,000 leh buhfai quintal 10 an pe a; an president Lalruatkima'n TNT hotute hnenah a hlân. Rescue Centre, Kàwmzáwlah pawh tun kar hian ṭanpuina pek leh an tum.

Bairabi Manchester United Fans Club pawhin Inrinni khan Bairabi North leh Bairabi South village task force-te hnenah Rs. 1,500 ve ve an hlàn bawk.

Liverpool FC ṭantu intél khawm, Mizoram Reds chuan an member-te sum thawh khawm hmangin Inrinni khan Durtlang BSUP CCC leh Mission Vengthlang SAI CCC-a awmte tan Rs. 20,000 hù ei tur chi hrang hrang an pe bawk a ni.