ASF vangin vawk 9,172 thi tawh

Vawk pùl hri, African Swine Fever (ASF) avangin nimin thleng khan Mizorama khua/veng 152 chu ASF infected area-ah puan a ni tawh a, chu'ngah chuan ASF vangin vawk 9,172 a thi tawh.

March 21, 2021 aṭanga nimin thleng khan Kolasib district tih loh Mizorama district dang zawng (10)-ah ASF a léng tih finfiah a ni tawh a; chutih laiin, infected area-a puan loh khua/veng 92 (district 11)-ah nimin thleng khan chhan hriat lohin vawk 699 a thi tawh bawk.

Mizorama ASF infected area leh ASF vanga vawk thi tamna ber chu Aizawl district a ni a, infected area 79 awmin, vawk 3,454 a thi tawh. Aizawl district-a ASF infected area 79 zinga 61 chu Aizawl khawpui chhunga veng hrang hrang a ni.

Aizawl district-ah hian infected area-a la puan loh, chhan hriat loha vawk thi awmna khua/veng 17 a awm tawh a, chu'ngah chuan vawk 234 a thi tawh a; ASF infected area ni loa vawk thi tamna ber district a ni.

Nimin thleng khan Salem Veng, Aizawlah vawk 258 a thi tawh a, Aizawl khawpuia ASF vanga vawk thi tamna ber veng a ni. Hetih lai hian, Sateek khua chu Aizawl district-a ASF vanga vawk thi tamna ber niin, vawk 472 a thi tawh.

Animal Husbandry & Veterinary (AH&Vety) department hriatpuinain ASF infected area 152 zinga 33-ah vawk 1,078 suat (cull) a ni tawh a, ASF infected area páwn khua/veng parukah vawk 53 suat a ni tawh bawk.

Mizorama ASF hri kai hmuh hmasak berna leh vawk thi awmna hmasa ber Lunglei district-a Lungsen khuaah nimin thleng khan vawk 757 a thi tawh a, Mizorama ASF vanga vawk thi tamna ber khua a ni.

ASF infected area neih dan aṭanga chhûtin, Khawzawl district chu vawk thi tamna ber a ni a; infected area-a puan pakhat chiah awmin, vawk 334 a thi tawh.

AH&Vety department chuan, chhan hriat loha vawk leh sanghal thi a awm chuan phone number 8731975444 leh 8974027269-ah hriattir zel turin mipui a ngen a ni.