ZPM hruaitute Aitlangah kal phalsak lo

ZPM Gen.Hqrs hruaitute chuan an secretary general PC Vanlalruata leh general secretary pahnih - Lalmuanpuia Punte leh B Lalchhanzova te hoin July 2, 2021 khan tun hnaia buaina thlenna hmun Vairengte Aitlang tlawh an tum a, mahse, police-in kal an remtih loh avangin a hmun an thleng thei lo.

ZPM hruaitute hian Vairengte Police Station-ah Mizoram police DIG Lalbiakthanga leh Kolasib SP Vanlalfaka Ralte te an kâwm a; Assam police-te chu Chief Minister Office aṭanga thupek an hmuh avanga thawk chhuak ni ngeia an lan thu police hotute chuan an hrilh.

Chief minister Zoramthanga kaihhruai Cabinet meeting-in kum 1875-a ramri siam chu Mizoram ramri dik taka an pawm tawh chu lawmawm an tih thu an sawi rualin ZPM thuchhuah chuan, "Pawm ringawt lo a, a taka luah ngei tura hma la tur leh 1875 ramri tihlanna official map siam turin Mizoram sorkar kan phût a ni," a ti.

ZPM chuan, CM Zoramthanga chu ramri buai chinfel dan thuruk hretu a ni tih sawiin, "Ramri chinfel dan thurûk a hriat kha a hman hun a thleng dawn chiah niin a lang. Hruaitu ṭha, kan ramri dik tak 1875 ramri min neih lêtsak thei CM a nih leh nih loh a lang chiang dawn ta hle a ni," an ti a; kum 1875 ramri chin nei lêt turin theihtawp chhuah tura CM Zoramthanga an beisei thu leh, NEDA-a an thawhpui a nih avangin Assam CM a hmin theih ngei an rin thu an sawi.

ZPM party chuan, ramri chungchanga buaina a chhuah lai leh buaina a chhuah loh lai pawha Mizoram humhalha ṭan la mar pát ṭhin Vairengte mipui huaisenna leh inpeknate an chhuan thu an tarlang bawk.